ദോഹ:ഖത്തറിന്റെ ടൂറിസം മേഖല സാമ്പത്തിക വൈവിധ്യവൽക്കരണത്തിന്റെ പ്രധാന ചാലകശക്തിയായി തുടരുന്നുവെന്ന് മോർഡർ ഇന്റലിജൻസ് പുറത്തിറക്കിയ പുതിയ ടൂറിസം വിപണി വിശകലന റിപ്പോർട്ട് വ്യക്തമാക്കുന്നു. തന്ത്രപ്രധാനമായ മാർക്കറ്റിംഗ് പ്രവർത്തനങ്ങളും മെച്ചപ്പെട്ട യാത്രാ കണക്റ്റിവിറ്റിയും പിന്തുണയോടെ 2026 വരെ സന്ദർശകസംഖ്യയും ടൂറിസം അടിസ്ഥാന സൗകര്യങ്ങളും സ്ഥിരമായി വർധിക്കുമെന്ന് റിപ്പോർട്ട് വിലയിരുത്തുന്നു.
പൈതൃക ആസ്തികളും വർധിച്ചു വരുന്ന ഇവന്റ് പ്രവർത്തനങ്ങളും ആധാരമാക്കി ഖത്തർ ആഗോള ശ്രദ്ധ ആകർഷിക്കുന്നതായി റിപ്പോർട്ടിൽ ചൂണ്ടിക്കാട്ടുന്നു. 2025 വർഷം ശക്തമായ നേട്ടങ്ങളോടെയാണ് ഖത്തർ ടൂറിസം മേഖല അവസാനിപ്പിച്ചതെന്നും, രാജ്യത്തുടനീളം പുതിയ അടിസ്ഥാന സൗകര്യങ്ങളും ഇവന്റ് ഓഫറുകളും വിപുലീകരിച്ചുവെന്നും വിശകലനം വ്യക്തമാക്കുന്നു.
ടൂറിസം മന്ത്രാലയത്തിന്റെ കണക്കുകൾ പ്രകാരം, 2025-ന്റെ ആദ്യ പകുതിയിൽ 26 ലക്ഷത്തിലധികം അന്താരാഷ്ട്ര സന്ദർശകരാണ് ഖത്തർ സന്ദർശിച്ചത്. ഇത് മുൻവർഷത്തേക്കാൾ മൂന്ന് ശതമാനം വർധനയാണ്. നയപരിഷ്കാരങ്ങൾ, മെച്ചപ്പെട്ട വിമാന കണക്റ്റിവിറ്റി, ലക്ഷ്യസ്ഥാന പ്രചാരണം എന്നിവയുടെ സംയുക്ത ഫലമാണ് ഈ വളർച്ചയെന്ന് ടൂറിസം രംഗത്തെ വിദഗ്ധർ വിലയിരുത്തുന്നു.
പ്രാദേശിക തലത്തിൽ ഗൾഫ് രാജ്യങ്ങളിൽ നിന്നുള്ള ശക്തമായ ആവശ്യം, യൂറോപ്പ്, ചൈന, ഓസ്‌ട്രേലിയ തുടങ്ങിയ ദീർഘദൂര വിപണികളിൽ നിന്നുള്ള വർധിച്ച താൽപ്പര്യം എന്നിവ ഖത്തറിന്റെ ടൂറിസം അടിത്തറ വൈവിധ്യമാർന്നതാക്കുന്നതായും റിപ്പോർട്ട് വ്യക്തമാക്കുന്നു. വിസ നടപടികളിലെ ലളിതവൽക്കരണവും വിമാനക്കമ്പനികൾ, ഹോട്ടലുകൾ, ടൂർ ഓപ്പറേറ്റർമാർ എന്നിവരിലുണ്ടായ മെച്ചപ്പെട്ട ഏകോപനവും സന്ദർശക വർധനയ്ക്ക് സഹായകമായി.
മിലാനോ ട്രാവൽസ് ആൻഡ് ടൂർസ് ജനറൽ മാനേജർ അലി താബത്ത് ദി പെനിൻസുലയോട് പറഞ്ഞു.“ഉയർന്ന തയ്യാറെടുപ്പോടെയാണ് ഖത്തർ 2026-ലേക്ക് കടക്കുന്നത്. പുതിയ ഇവന്റുകളുടെ ആരംഭവും വിമാന ശൃംഖലയുടെ വികസനവും അടിസ്ഥാന സൗകര്യങ്ങളുടെ തുടർച്ചയായ മെച്ചപ്പെടുത്തലുമാണ് ഈ മേഖലയെ കൂടുതൽ പ്രതിരോധശേഷിയുള്ളതാക്കിയത്.”
എന്നാൽ, സീസണൽ ആശ്രിതത്വവും പ്രധാന ഇവന്റുകളെ ആശ്രയിച്ചുള്ള സന്ദർശക പ്രവണതയും ഇപ്പോഴും വെല്ലുവിളികളായി തുടരുന്നുവെന്ന് റിപ്പോർട്ട് ചൂണ്ടിക്കാട്ടുന്നു. 2025-ലെ ഈദ് അൽ ഫിത്തർ കാലഘട്ടത്തിലാണ് ഏറ്റവും ഉയർന്ന സന്ദർശക നിരക്ക് രേഖപ്പെടുത്തിയത്.
ഹോട്ടൽ മുറികളുടെ എണ്ണം ഏകദേശം 41,000 ആയി വർധിപ്പിച്ചിട്ടുണ്ടെങ്കിലും, തിരക്കേറിയ കാലങ്ങളിൽ ലഭ്യതയ്ക്ക് സമ്മർദ്ദം അനുഭവപ്പെടുന്നതായും, വിലക്കയറ്റവും ഉയർന്ന യാത്രാ ചെലവുകളും ചില സന്ദർശകർക്ക് തടസ്സമാകുന്നതായും വിലയിരുത്തലിൽ പറയുന്നു.
വളർച്ച നിലനിർത്താൻ സേവന നിലവാരം മെച്ചപ്പെടുത്തലും സന്ദർശക അനുഭവം ശക്തിപ്പെടുത്തലും നിർണായകമാണെന്ന് അലി താബത്ത് വ്യക്തമാക്കി. വർഷം മുഴുവൻ ആവശ്യകത വ്യാപിപ്പിക്കുക, ഇവന്റുകൾ വൈവിധ്യമാർന്നതാക്കുക, അടിസ്ഥാന സൗകര്യങ്ങൾ കൂടുതൽ ശക്തിപ്പെടുത്തുക തുടങ്ങിയ ലക്ഷ്യങ്ങളോടെയാണ് ഖത്തർ മുന്നോട്ട് പോകുന്നത്.
2025-ലെ ശക്തമായ മുന്നേറ്റത്തിന്റെ പാതയിൽ, 2026-ൽ ഖത്തർ ടൂറിസം മേഖലക്ക് വലിയ വളർച്ചാ സാധ്യതകൾ ഉണ്ടെന്ന് റിപ്പോർട്ട് വ്യക്തമാക്കുന്നു.