ദോഹ: വാഷിംഗ്ടണും ടെഹ്‌റാനും തമ്മിലുള്ള ചർച്ചകൾ വഴിത്തിരിവിലെത്തിക്കാനും മേഖലയിൽ ശാശ്വത സമാധാനം ഉറപ്പാക്കാനുമുള്ള നയതന്ത്ര ശ്രമങ്ങൾ ഖത്തർ ശക്തമായി തുടരുന്നതായി വിദേശകാര്യ മന്ത്രാലയം (MoFA) അറിയിച്ചു. മന്ത്രാലയത്തിന്റെ പ്രതിവാര മാധ്യമ വിശകലനത്തിൽ മീഡിയ ആൻഡ് കമ്മ്യൂണിക്കേഷൻ ഡിപ്പാർട്ട്‌മെന്റ് ഡയറക്ടർ ഇബ്രാഹിം ബിൻ സുൽത്താൻ അൽ ഹാഷിമിയാണ് ഖത്തറിന്റെ നിർണായക ഇടപെടലുകളെക്കുറിച്ച് വിശദീകരിച്ചത്.
മേഖലയിലെ സംഘർഷങ്ങൾ ലഘൂകരിക്കുന്നതിന്റെ ഭാഗമായി ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽഥാനി വാഷിംഗ്ടണിൽ യുഎസ് വൈസ് പ്രസിഡന്റ് ജെ.ഡി. വാൻസമായും പ്രസിഡന്റ് ഡൊണാൾഡ് ട്രംപുമായും കൂടിക്കാഴ്ച നടത്തി. യുഎസ്-ഇറാൻ ചർച്ചകളിൽ പുരോഗതി കൈവരിക്കുന്നതിനെക്കുറിച്ചും മേഖലയിലെ സുരക്ഷ ഉറപ്പാക്കുന്നതിനെക്കുറിച്ചും നേതാക്കൾ വിശദമായ ആശയവിനിമയം നടത്തി.
സൗദി അറേബ്യ, യുഎഇ, ഇറാൻ, കുവൈറ്റ്, സൈപ്രസ്, ഈജിപ്ത്, തുർക്കി എന്നീ രാജ്യങ്ങളിലെ വിദേശകാര്യ മന്ത്രിമാരുമായും യൂറോപ്യൻ യൂണിയൻ ഹൈപ്രതിനിധി കാജ കല്ലസുമായും പ്രധാനമന്ത്രി ടെലിഫോൺ ചർച്ചകൾ നടത്തിയതായും അൽ ഹാഷിമി വ്യക്തമാക്കി.
