ദോഹ: റോഡ് സുരക്ഷാ രംഗത്ത് ആഗോളതലത്തിൽ ശ്രദ്ധേയമായ നേട്ടം കൈവരിച്ച് ഖത്തർ. കഴിഞ്ഞ പത്ത് വർഷത്തിനിടയിൽ റോഡപകട മരണനിരക്കിൽ 61 ശതമാനത്തിന്റെ കുറവ് രേഖപ്പെടുത്തി. ജനസംഖ്യയിൽ 72 ശതമാനം വർദ്ധനവ് ഉണ്ടായിട്ടും മരണനിരക്ക് ഓരോ ഒരു ലക്ഷം ആളുകൾക്കും 12.8 എന്നതിൽ നിന്ന് 5 ആയി കുറഞ്ഞു. പൊതുജനാരോഗ്യ മന്ത്രാലയം പുറത്തിറക്കിയ 'നാഷണൽ ഗൈഡ്‌ലൈൻസ് ഫോർ പ്രിവൻഷൻ ഓഫ് റോഡ് ട്രാഫിക് ഇഞ്ചുറീസ്' എന്ന റിപ്പോർട്ടിലാണ് ഈ വിവരങ്ങളുള്ളത്.
അപകടങ്ങളിൽ പെടുന്നവരിൽ 32% കാൽനടയാത്രക്കാരും, 28% ഡ്രൈവർമാരുമാണ്. 15 മുതൽ 19 വയസ്സുവരെയുള്ള യുവാക്കളാണ് അപകടങ്ങളിൽ പെടാൻ കൂടുതൽ സാധ്യതയുള്ള വിഭാഗം. സീറ്റ് ബെൽറ്റ് ധരിക്കാത്തവരും ഡെലിവറി മോട്ടോർ സൈക്കിൾ ഡ്രൈവർമാരും അപകടസാധ്യതയുള്ളവരുടെ പട്ടികയിലുണ്ട്. വേഗത കുറയ്ക്കുക, ഹെൽമെറ്റും സീറ്റ് ബെൽറ്റും നിർബന്ധമാക്കുക, ഡ്രൈവിംഗിനിടെ ഫോൺ ഉപയോഗിക്കാതിരിക്കുക തുടങ്ങിയ നിർദ്ദേശങ്ങൾ മന്ത്രാലയം കർശനമാക്കിയിട്ടുണ്ട്.
