ദോഹ: പാസഞ്ചർ കാറുകൾ, ബസുകൾ, ലൈറ്റ് ട്രക്കുകൾ എന്നിവയുടെ ടയറുകൾ വിൽക്കുന്നതിനുള്ള കാലാവധി നീട്ടുന്നത് നിയന്ത്രിക്കുന്നതിനായി പുതിയ സാങ്കേതിക മാനദണ്ഡങ്ങൾ ഖത്തർ ജനറൽ ഓർഗനൈസേഷൻ ഫോർ സ്റ്റാൻഡേർഡ്സ് ആൻഡ് മെട്രോളജി (QGOSM) പ്രഖ്യാപിച്ചു. കാർ ടയറുകൾ സൂക്ഷിക്കുന്നതിനുള്ള ഖത്തരി മാനദണ്ഡങ്ങൾ (QS 581) പരിഷ്കരിച്ചുകൊണ്ടുള്ള വാണിജ്യ-വ്യവസായ മന്ത്രാലയത്തിന്റെ (MOCI) 2026-ലെ 35-ാം നമ്പർ തീരുമാനത്തിന്റെ അടിസ്ഥാനത്തിലാണ് ഈ പുതിയ നടപടി.
​ടയറുകളുടെ വിൽപന കാലാവധി നീട്ടുന്നത് സ്വാഭാവികമായ ഒരു പ്രക്രിയ ആയിരിക്കില്ലെന്നും, മറിച്ച് പ്രാദേശിക വിപണിയിലെ ഉൽപ്പന്നങ്ങളുടെ ഗുണനിലവാരവും സുരക്ഷിതത്വവും ഉയർന്ന തലത്തിൽ നിലനിർത്തുന്നതിനായി കർശനമായ സാങ്കേതിക നിബന്ധനകൾക്ക് വിധേയമായിരിക്കുമെന്നും ക്യു.ജി.ഒ.എസ്.എം എഞ്ചിനീയറിംഗ് സ്പെസിഫിക്കേഷൻ സെക്ഷൻ മേധാവി എഞ്ചിനീയർ സുൽത്താൻ ഹസ്സൻ അൽ കുവാരി ബുധനാഴ്ച (ഇന്നലെ) വ്യക്തമാക്കി.
​ഏജന്റുമാരും വിൽപനശാലകളും എല്ലാ സാങ്കേതിക ആവശ്യകതകളും പാലിക്കുകയാണെങ്കിൽ, ടയറുകൾ വിൽക്കുന്നതിന് 6 മാസം കൂടി അധികമായി അനുവദിക്കാൻ പുതിയ നിയന്ത്രണങ്ങൾ അനുവാദം നൽകുന്നുണ്ട്. എന്നാൽ, ഇങ്ങനെ കാലാവധി നീട്ടി നൽകുന്ന ടയറുകൾക്ക് ഉപഭോക്താക്കൾക്ക് 3 മാസം അധിക വാറന്റി കൂടി നൽകാൻ കമ്പനികൾ ബാധ്യസ്ഥരായിരിക്കും. ഇതോടെ ഇത്തരം ടയറുകളുടെ ആകെ വാറന്റി കാലാവധി ഒരു വർഷവും മൂന്ന് മാസവുമായി (15 മാസം) ഉയരും.
​കാലാവധി നീട്ടാൻ ആഗ്രഹിക്കുന്ന കമ്പനികളുടെ അപേക്ഷകൾ ഓർഗനൈസേഷൻ വിശദമായി പഠിക്കുകയും നിബന്ധനകൾ പാലിക്കുന്നവർക്ക് മാത്രം അനുമതി നൽകുകയും ചെയ്യും. നിയമം ലംഘിച്ചുള്ള വിൽപനകൾ തടയാൻ വാണിജ്യ-വ്യവസായ മന്ത്രാലയത്തിന് കീഴിലുള്ള കൺസ്യൂമർ പ്രൊട്ടക്ഷൻ ആൻഡ് ആന്റി-കൊമേഴ്സ്യൽ ഫ്രോഡ് ഡിപ്പാർട്ട്മെന്റുമായി സഹകരിച്ച് കമ്പനി വെയർഹൗസുകളിലും ഷോറൂമുകളിലും വരും ദിവസങ്ങളിൽ കർശന പരിശോധനകൾ നടത്തുമെന്നും അധികൃതർ അറിയിച്ചു.
​റോഡ് ഉപയോക്താക്കളുടെ സുരക്ഷിതത്വം ഉറപ്പാക്കാനും, വിപണിയിലെ സുരക്ഷിതമല്ലാത്ത പ്രവണതകൾ തടയാനും ലക്ഷ്യമിട്ടുള്ള ഈ തീരുമാനവുമായി എല്ലാ ഏജന്റുമാരും വിൽപന കേന്ദ്രങ്ങളും പൂർണ്ണമായി സഹകരിക്കണമെന്ന് ഖത്തർ ജനറൽ ഓർഗനൈസേഷൻ ഫോർ സ്റ്റാൻഡേർഡ്സ് ആൻഡ് മെട്രോളജി ആവശ്യപ്പെട്ടു.