​ദോഹ: ഖത്തറിൽ താമസക്കാരുടെ വ്യക്തിഗത തിരിച്ചറിയൽ കാർഡ് (ഖത്തർ ഐഡി) ഫോട്ടോകൾ അംഗീകൃത ഫോട്ടോഗ്രാഫി സ്റ്റുഡിയോകൾ വഴി പുതുക്കുന്ന പുതിയ പദ്ധതിയുടെ വിശദാംശങ്ങൾ ആഭ്യന്തര മന്ത്രാലയം പുറത്തുവിട്ടു.
​പൊതു-സ്വകാര്യ മേഖലകളിലെ വിവിധ സ്ഥാപനങ്ങളുമായി സഹകരിച്ച് പൊതുജനങ്ങൾക്കുള്ള സേവനങ്ങൾ തുടർച്ചയായി മെച്ചപ്പെടുത്തുന്നതിന്റെ ഭാഗമായാണ് ഈ പദ്ധതിയെന്ന് പാസ്പോർട്ട് ജനറൽ ഡയറക്ടറേറ്റിലെ പ്രവാസികാര്യ വകുപ്പ് എൻട്രി വിസ വിഭാഗം മേജർ മുഹമ്മദ് അലി മുഹമ്മദ് വ്യക്തമാക്കി. നടപടിക്രമങ്ങൾ ലളിതമാക്കുന്നതിനും, സേവനങ്ങളുടെ ഗുണനിലവാരം ഉയർത്തുന്നതിനും, അംഗീകൃത മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുമാണ് പുതിയ സംവിധാനം ലക്ഷ്യമിടുന്നത്.
​ഫോട്ടോഗ്രാഫി സ്റ്റുഡിയോ ഉടമകൾക്കായി സംഘടിപ്പിച്ച പ്രത്യേക ശിൽപ്പശാലയിലാണ് അധികൃതർ ഇക്കാര്യം വ്യക്തമാക്കിയത്. താമസക്കാരുടെ ഐഡി കാർഡുകൾക്കായുള്ള ഫോട്ടോകൾ നൽകുന്ന സേവനത്തെക്കുറിച്ചും, അതിന്റെ സാങ്കേതിക മാനദണ്ഡങ്ങളെക്കുറിച്ചും സ്റ്റുഡിയോ ഉടമകളെ ശിൽപ്പശാലയിൽ പരിചയപ്പെടുത്തി. ആവശ്യമായ കാര്യക്ഷമതയോടെയും ഉയർന്ന ഗുണനിലവാരത്തോടെയും സേവനം ലഭ്യമാക്കാൻ സ്റ്റുഡിയോകളെ സജ്ജമാക്കുകയാണ് ഇതിലൂടെ ലക്ഷ്യമിടുന്നത്.
​ജനറൽ ഡിപ്പാർട്ട്മെന്റ് ഓഫ് കമ്മ്യൂണിക്കേഷൻസ് ആൻഡ് ഇൻഫർമേഷൻ സിസ്റ്റംസിലെ ഫസ്റ്റ് ലെഫ്റ്റനന്റ് എൻജിനീയർ അലി ഹസൻ അബ്ദുൽ റഹീം അറിയിച്ചതനുസരിച്ച്, സർവീസ് ഹാൾസ് ആൻഡ് ഇൻഫർമേഷൻ സിസ്റ്റംസ് വകുപ്പുമായി സഹകരിച്ച് സേവനത്തിനായുള്ള സാങ്കേതിക സജ്ജീകരണങ്ങളും പ്രവർത്തന അടിസ്ഥാന സൗകര്യങ്ങളും പൂർത്തിയായിട്ടുണ്ട്. ആഭ്യന്തര മന്ത്രാലയത്തിന്റെ ഔദ്യോഗിക വെബ്‌സൈറ്റ് വഴിയും 'മെത്രാഷ്' (Metrash) ആപ്ലിക്കേഷൻ വഴിയുമായിരിക്കും ഈ സേവനം ലഭ്യമാകുക.
​എല്ലാ സാങ്കേതിക ആവശ്യകതകളും പൂർത്തിയായി എന്ന് ഉറപ്പുവരുത്തിയ ഉടൻ തന്നെ ഫോട്ടോഗ്രാഫി സ്റ്റുഡിയോ ഉടമകളുടെ സഹകരണത്തോടെ മന്ത്രാലയം സേവനം ഔദ്യോഗികമായി ആരംഭിക്കുമെന്ന് അധികൃതർ വ്യക്തമാക്കി.