ദോഹ: ഖത്തർ സയന്റിഫിക് ക്ലബ്ബും (QSC) വിദ്യാഭ്യാസ-ഉന്നതവിദ്യാഭ്യാസ മന്ത്രാലയവും സംയുക്തമായി സംഘടിപ്പിച്ച ഒൻപതാമത് ശാസ്ത്ര ഗവേഷണ-ഇന്നൊവേഷൻ പ്രദർശനത്തിലെ (Scientific Exhibition for Innovation & Research) വിജയികളെ ആദരിച്ചു. വിദ്യാർത്ഥികളിൽ ശാസ്ത്രീയ ഗവേഷണ സംസ്‌കാരവും നവീകരണവും പ്രോത്സാഹിപ്പിക്കുക, ഖത്തർ നാഷണൽ വിഷൻ 2030-ന്റെ ലക്ഷ്യങ്ങളെ പിന്തുണയ്ക്കുക എന്നിവ മുൻനിർത്തിയാണ് പ്രദർശനം സംഘടിപ്പിച്ചത്. വിവിധ സ്കൂളുകളിൽ നിന്നായി സമർപ്പിക്കപ്പെട്ട 290 പ്രൊജക്ടുകളിൽ നിന്ന് കടുത്ത വിലയിരുത്തലുകൾക്ക് ശേഷം ഫൈനൽ റൗണ്ടിലെത്തിയ 61 പ്രൊജക്ടുകളാണ് പ്രദർശനത്തിൽ മാറ്റുരച്ചത്.
വിദ്യാഭ്യാസ മന്ത്രാലയത്തിലെയും കായിക-യുവജന മന്ത്രാലയത്തിലെയും ഉന്നത ഉദ്യോഗസ്ഥർ, സ്കൂൾ അധികൃതർ എന്നിവരുടെ സാന്നിധ്യത്തിൽ നടന്ന ചടങ്ങിൽ വിജയികൾക്കുള്ള സ്വർണ്ണ മെഡലുകളും പുരസ്കാരങ്ങളും വിതരണം ചെയ്തു. വിദ്യാർത്ഥികളിലെ കളിമൺ ആശയങ്ങളെ വികസിപ്പിച്ചെടുക്കാൻ കഴിയുന്ന പ്രൊജക്ടുകളാക്കി മാറ്റാൻ ഇത്തരം വേദികൾ സഹായിക്കുമെന്ന് ക്ലബ്ബ് ഡെപ്യൂട്ടി എക്സിക്യൂട്ടീവ് ഡയറക്ടർ അബ്ദുൽറഹ്മാൻ സാലിഹ് ഖമീസ് പറഞ്ഞു. 2017-ൽ ആരംഭിച്ച ഈ മത്സരം ഒൻപത് വർഷമായി വിദ്യാർത്ഥികളുടെ ഗവേഷണ മികവ് തെളിയിക്കാനുള്ള വലിയൊരു പ്ലാറ്റ്‌ഫോമായി മാറിയിട്ടുണ്ടെന്ന് ക്ലബ്ബ് അഡ്മിനിസ്ട്രേറ്റീവ് ആൻഡ് ഫിനാൻഷ്യൽ അഫയേഴ്സ് ഡയറക്ടർ ഫാത്തിമ അൽ മുഹന്നദി വ്യക്തമാക്കി
