ദോഹ: പശ്ചിമേഷ്യൻ രാഷ്ട്രീയത്തിലും ആഗോള ഊർജ്ജ വിപണിയിലും നിർണായക സ്വാധീനമുറപ്പിക്കുന്ന നയതന്ത്ര നീക്കങ്ങളുമായി ഖത്തർ. ഹോർമുസ് ഇടുക്കിന്റെ നിയന്ത്രണം ഏതെങ്കിലും ഒരു രാജ്യത്തിന്റെ മാത്രം കൈകളിൽ ഒതുങ്ങുന്നത് അംഗീകരിക്കാനാകില്ലെന്ന് ഖത്തർ പ്രധാനമന്ത്രി ശൈഖ് മുഹമ്മദ് ബിൻ അബ്ദുൽറഹ്മാൻ അൽ ഥാനി എടുത്തുപറഞ്ഞു. 'ഫിനാൻഷ്യൽ ടൈംസിന്' അനുവദിച്ച പ്രത്യേക അഭിമുഖത്തിലാണ് ലോകരാജ്യങ്ങൾ ഉറ്റുനോക്കുന്ന ഖത്തറിന്റെ ഔദ്യോഗിക നിലപാടുകൾ അദ്ദേഹം വ്യക്തമാക്കിയത്.​ഹോർമുസ് ഇടുക്ക് ഖത്തറിന്റെ മാത്രമല്ല, ലോകത്തിന്റെ തന്നെ പ്രധാന നാവിക പാതയാണെന്ന് പ്രധാനമന്ത്രി ഓർമ്മിപ്പിച്ചു. കപ്പലുകൾക്ക് മേൽ ടോൾ ചുമത്താനുള്ള ഇറാന്റെ നീക്കങ്ങളെ തള്ളിക്കളഞ്ഞ അദ്ദേഹം, യു.എസ്-ഇറാൻ ധാരണാപത്രം നടപ്പിലായി 30 ദിവസത്തിനകം ഇടുക്കിലൂടെയുള്ള ഗതാഗതം പൂർണ്ണതോതിലാകുമെന്ന പ്രതീക്ഷ പങ്കുവെച്ചു. ഒമാനും മറ്റ് ഗൾഫ് രാഷ്ട്രങ്ങളും ഇറാനും ഉൾപ്പെടുന്ന ഒരു സംയുക്ത സുരക്ഷാ സമിതിയാണ് മേഖലയുടെ സ്ഥിരതയ്ക്ക് ആവശ്യമെന്ന ദീർഘവീക്ഷണവും അദ്ദേഹം മുന്നോട്ടുവെച്ചു.യുദ്ധത്തിന്റെ തുടക്കത്തിൽ പ്ലാന്റുകൾക്ക് നേരെ ഉണ്ടായ ആക്രമണങ്ങളെത്തുടർന്ന് നിർത്തിവെച്ച പ്രകൃതിവാതക (LNG) ഉൽപ്പാദനം വരും ആഴ്ചകളിൽ ഖത്തർ പുനരാരംഭിക്കും. കയറ്റുമതിക്കായി കപ്പലുകൾ സജ്ജമായിക്കഴിഞ്ഞു. എങ്കിലും, സുരക്ഷാ കാര്യങ്ങളിൽ യാതൊരു വിട്ടുവീഴ്ചയ്ക്കും തയ്യാറല്ലെന്ന സൂചന നൽകിക്കൊണ്ട്, സാഹചര്യങ്ങൾ പൂർണ്ണമായും അനുകൂലമാകാതെ 'ഫോഴ്സ് മജ്യൂർ' (Force Majeure) പിൻവലിക്കില്ലെന്ന് ഖത്തർ എനർജി വ്യക്തമാക്കിയിട്ടുണ്ട്.ഇറാന്റെ സാമ്പത്തിക പുനരുദ്ധാരണത്തിനായി വിഭാവനം ചെയ്ത 300 ബില്യൺ ഡോളറിന്റെ ഫണ്ടിനെ 'അതിമോഹം' എന്ന് വിശേഷിപ്പിച്ച പ്രധാനമന്ത്രി, ഖത്തറിന്റെ നിക്ഷേപങ്ങൾ എപ്പോഴും രാഷ്ട്രീയത്തിനതീതമായി വാണിജ്യപരമായ ലാഭനഷ്ടങ്ങൾ നോക്കി മാത്രമായിരിക്കുമെന്ന് കൂട്ടിച്ചേർത്തു. അതോടൊപ്പം, ലെബനൻ അതിർത്തിയിലെ സംഘർഷങ്ങളിൽ ഇസ്രായേൽ നടത്തുന്ന തിരിച്ചടികൾ അതിരുകടന്നതാണെന്നും അത് മേഖലയിലെ സമാധാനശ്രമങ്ങൾക്ക് തിരിച്ചടിയാകുമെന്നും അദ്ദേഹം ശക്തമായ ഭാഷയിൽ വിമർശിച്ചു.