ദോഹ: ഖത്തർ അമീർ ഹിസ് ഹൈനസ് ഷെയ്ഖ് തമീം ബിൻ ഹമദ് അൽ താനി ഗ്രീസിൽ നടത്തിയ ഔദ്യോഗിക സന്ദർശനത്തിന് അന്താരാഷ്ട്ര തലത്തിൽ വൻ വാർത്താപ്രാധാന്യം. സന്ദർശനത്തിന്റെ ഫലമായി ഇരുരാജ്യങ്ങളും തമ്മിലുള്ള ബന്ധത്തിൽ പുതിയ അധ്യായം തുറന്നതായി ഗ്രീക്ക് മാധ്യമങ്ങൾ റിപ്പോർട്ട് ചെയ്യുന്നു.കൂടിക്കാഴ്ചയിൽ വ്യാപാരം, ഊർജ്ജം, പ്രതിരോധം, ഭക്ഷ്യസുരക്ഷ എന്നീ മേഖലകളിൽ സഹകരണം വർധിപ്പിക്കാൻ ഇരുരാജ്യങ്ങളും തമ്മിൽ ധാരണയായി.പശ്ചിമേഷ്യൻ വിഷയങ്ങളിൽ സജീവവും ഗൗരവമേറിയതുമായ പങ്കാളിയെന്ന നിലയിൽ ഗ്രീസിന്റെ പങ്ക് ഉറപ്പിക്കാൻ ഈ സന്ദർശനം വഴിയൊരുക്കി.നിലവിലെ പ്രാദേശിക സാഹചര്യങ്ങൾ കണക്കിലെടുക്കുമ്പോൾ, ഇരുരാജ്യങ്ങളും തമ്മിലുള്ള തന്ത്രപരമായ ബന്ധം കൂടുതൽ ശക്തിപ്പെടുത്തേണ്ടത് അത്യാവശ്യമാണെന്ന് കൂടിക്കാഴ്ച വിലയിരുത്തി.
വരും കാലയളവിൽ സാമ്പത്തിക ബന്ധങ്ങൾ കൂടുതൽ ആഴത്തിലുള്ളതാക്കാനും പുതിയ നിക്ഷേപ സാധ്യതകൾ തേടാനുമുള്ള ഗ്രീസിന്റെ താൽപ്പര്യത്തിന് ഈ സന്ദർശനം വലിയ ഊർജ്ജമാണ് നൽകിയിരിക്കുന്നത്. ഖത്തറും ഗ്രീസും തമ്മിലുള്ള സമാനതകളില്ലാത്ത നയതന്ത്ര മുന്നേറ്റമായാണ് ഈ സന്ദർശനത്തെ അന്താരാഷ്ട്ര നിരീക്ഷകർ വിലയിരുത്തുന്നത്.
