ഒന്നാം സ്ഥാനം
ദോഹ: വേൾഡ് ഇന്റലക്ച്വൽ പ്രോപ്പർട്ടി ഓർഗനൈസേഷൻ (WIPO) പുറത്തുവിട്ട 2026-ലെ ഗ്ലോബൽ ഇന്നൊവേഷൻ സൂചികയിൽ (GII) ശ്രദ്ധേയമായ നേട്ടങ്ങളുമായി ഖത്തർ. പബ്ലിക് ഇൻഫ്രാസ്ട്രക്ചർ സൂചികയിലും ഉന്നത വിദ്യാഭ്യാസ മേഖലയിലെ അന്താരാഷ്ട്ര വിദ്യാർത്ഥി പങ്കാളിത്ത സൂചികയിലും ഖത്തർ ആഗോളതലത്തിലും പ്രാദേശികതലത്തിലും ഒന്നാം സ്ഥാനം സ്വന്തമാക്കി.
തുടർച്ചയായ ആറാം വർഷമാണ് ആഗോള ഇന്നൊവേഷൻ സൂചികയിൽ ഖത്തർ മുന്നേറ്റം തുടരുന്നത്. 2020-ൽ 70-ാം സ്ഥാനത്തായിരുന്ന ഖത്തർ, 23 സ്ഥാനങ്ങൾ മുകളിലേക്ക് ഉയർന്ന് 2026-ൽ 47-ാം സ്ഥാനത്തെത്തി. രാജ്യത്തെ വിവരാനുബന്ധ സാങ്കേതികവിദ്യ (ICT), മനുഷ്യവിഭവശേഷി, ഗവേഷണം, അടിസ്ഥാന സൗകര്യ വികസനം എന്നീ മേഖലകളിൽ കൈവരിച്ച മികച്ച പുരോഗതിയാണ് ഈ നേട്ടത്തിന് പിന്നിൽ.രാജ്യത്തെ വിവിധ സർക്കാർ സ്ഥാപനങ്ങളുടെയും ഏജൻസികളുടെയും ഏകോപിപ്പിച്ചുള്ള പ്രവർത്തനങ്ങളുടെ ഫലമാണ് ഈ നേട്ടമെന്ന് നാഷണൽ പ്ലാനിങ് കൗൺസിൽ അസിസ്റ്റന്റ് സെക്രട്ടറി ജനറൽ അബ്ദുൽ അസീസ് അഹമ്മദ് അൽ ഫൈഹാനി പറഞ്ഞു. ഖത്തർ നാഷണൽ വിഷൻ 2030-ന് അനുസൃതമായി രാജ്യാന്തര തലത്തിൽ ഖത്തറിന്റെ മത്സരക്ഷമത വർദ്ധിപ്പിക്കാൻ ഈ പുരോഗതി സഹായിക്കുമെന്നും അദ്ദേഹം കൂട്ടിച്ചേർത്തു.
ഗവേഷണ-വികസന രംഗത്തെ സജീവമായ പിന്തുണയും, ഡിജിറ്റൽ പരിവർത്തനവും, നൂതനാശയങ്ങൾക്ക് ധനസഹായം നൽകുന്ന പദ്ധതികളും ഖത്തറിലെ സ്റ്റാർട്ടപ്പ് സംവിധാനത്തെ കൂടുതൽ ശക്തിപ്പെടുത്തിയതായി ഖത്തർ റിസർച്ച്, ഡെവലപ്പ്മെന്റ് ആൻഡ് ഇന്നൊവേഷൻ കൗൺസിൽ സെക്രട്ടറി ജനറൽ എഞ്ചിനീയർ ഉമർ അലി അൽ അൻസാരി വ്യക്തമാക്കി.
