ദോഹ: വിഖ്യാത ചിത്രകാരൻ മഖ്ബൂൽ ഫിദ ഹുസൈന്റെ (എം.എഫ്. ഹുസൈൻ) കലാസൃഷ്ടികളിൽ നിന്ന് പ്രചോദനമുൾക്കൊണ്ട് ഖത്തർ ഫൗണ്ടേഷന്റെ കീഴിലുള്ള 'ലൗഹ് വ ഖലം: എം.എഫ്. ഹുസൈൻ മ്യൂസിയം' സമ്മർ വർക്ക്ഷോപ്പുകൾ സംഘടിപ്പിക്കുന്നു. 'പെയിന്റ് യുവർ സമ്മർ' (Paint Your Summer) എന്ന പ്രമേയത്തിൽ നടക്കുന്ന ഈ വേനൽക്കാല ക്യാമ്പിൽ വൈവിധ്യമാർന്ന കലാപരിപാടികളാണ് പൊതുജനങ്ങൾക്കായി ഒരുക്കിയിരിക്കുന്നത്.
പങ്കെടുക്കുന്നവർക്ക് മെറ്റൽ എംബോസിംഗ് (Metal embossing) സാങ്കേതികവിദ്യയിലൂടെ ആകർഷകമായ ടെക്സ്ചർ ഡിസൈനുകളും രൂപങ്ങളും സൃഷ്ടിക്കാൻ വർക്ക്ഷോപ്പിൽ അവസരമുണ്ട്. കൂടാതെ, സംവേദനാത്മക കഥപറച്ചിൽ സെഷനുകൾക്ക് (Interactive story sessions) ശേഷം, ഓയിൽ പാസ്റ്റലുകളും ലളിതമായ ഡ്രോയിംഗ് ട്രാൻസ്ഫർ രീതികളും ഉപയോഗിച്ച് എം.എഫ്. ഹുസൈന്റെ പ്രശസ്തമായ കുതിരച്ചിത്രങ്ങളുടെ മാതൃകയിലുള്ള സ്വന്തം കലാസൃഷ്ടികൾ നിർമ്മിക്കാനും ക്യാമ്പിലെത്തുന്നവർക്ക് സാധിക്കും.
വേനൽക്കാലം മുഴുവൻ നീണ്ടുനിൽക്കുന്ന വ്യത്യസ്തങ്ങളായ ആർട്ട് വർക്കുകളാണ് ഇതിന്റെ ഭാഗമായി ആസൂത്രണം ചെയ്തിരിക്കുന്നത്. താല്പര്യമുള്ളവർക്ക് ഗൂഗിൾ പ്ലേ സ്റ്റോറിലും ആപ്പിൾ ആപ്പ് സ്റ്റോറിലും ലഭ്യമായ 'എജ്യുക്കേഷൻ സിറ്റി ആപ്പ്' (Education City App) വഴിയോ, https://educationcity.qa/ എന്ന വെബ്സൈറ്റ് സന്ദർശിച്ചോ പ്രോഗ്രാമുകൾ പരിശോധിക്കാനും രജിസ്റ്റർ ചെയ്യാനും സാധിക്കുമെന്ന് അധികൃതർ അറിയിച്ചു.
