ദോഹ: രാജ്യത്തെ കുട്ടികളിലും കൗമാരക്കാരിലും കായിക താല്പര്യവും ശാരീരികക്ഷമതയും വളർത്തുകയെന്ന ലക്ഷ്യത്തോടെ ഖത്തർ ഫൗണ്ടേഷൻ്റെ (QF) പ്രീ-യൂണിവേഴ്സിറ്റി എജ്യുക്കേഷന്റെ നേതൃത്വത്തിൽ 'മുഖായംന' (Mukayamna) സമ്മർ കായിക ക്യാമ്പ് ആരംഭിച്ചു. 6 മുതൽ 16 വയസ്സുവരെയുള്ള കുട്ടികൾക്കായി നടത്തുന്ന ക്യാമ്പിൽ വൈവിധ്യമാർന്ന കായിക ഇനങ്ങളിലാണ് പരിശീലനം നൽകുന്നത്. ഭിന്നശേഷിക്കാരായ കുട്ടികൾക്ക് മുൻഗണന നൽകിക്കൊണ്ടുള്ള പ്രത്യേക കായിക വിനോദങ്ങളും ഉൾപ്പെടുത്തിയിട്ടുണ്ട്.
​വേനൽക്കാല അവധിക്കാലം ഫലപ്രദമായി വിനിയോഗിക്കാൻ സഹായിക്കുന്ന ഈ ക്യാമ്പിൽ സൈക്ലിംഗ്, തായ്‌ക്വോണ്ടോ, നീന്തൽ, ബാസ്‌ക്കറ്റ്‌ബോൾ, വോളിബോൾ തുടങ്ങിയ വ്യത്യസ്ത ഇനങ്ങളിലാണ് കുട്ടികൾക്ക് വിദഗ്ദ്ധ പരിശീലനം നൽകുന്നത്.കുട്ടികൾക്ക് മുൻപ് പരിചയമില്ലാത്ത പുതിയ കായിക ഇനങ്ങൾ സ്വയം പരീക്ഷിച്ച് അറിയാനുള്ള മികച്ച അവസരമാണ് ക്യാമ്പ് ഒരുക്കുന്നതെന്ന് ഖത്തർ ഫൗണ്ടേഷൻ പ്രീ-യൂണിവേഴ്സിറ്റി എജ്യുക്കേഷനിലെ കായിക വിഭാഗം മേധാവി അബ്ദുള്ള ഷഹീൻ അൽ കഅബി പറഞ്ഞു."ഒരു കായികതാരത്തിൻ്റെ കരിയർ കെട്ടിപ്പടുക്കാൻ ചെറുപ്രായത്തിലുള്ള പരിശീലനമാണ് ഏറ്റവും അഭികാമ്യം. അത് കുട്ടികളിൽ ആത്മവിശ്വാസം വളർത്താനും കായികക്ഷമതയും കൗശലങ്ങളും കാലാനുസൃതമായി മെച്ചപ്പെടുത്താനും സഹായിക്കും. കേവലം പരിശീലനത്തിനപ്പുറം കായിക മത്സരങ്ങളുടെ ആവേശം അനുഭവിക്കാനും അവർക്ക് ഈ ക്യാമ്പ് വഴിയൊരുക്കുന്നു," അൽ കഅബി വ്യക്തമാക്കി.ഖത്തർ നാഷണൽ വിഷൻ 2030-ന് അനുസൃതമായി, സമൂഹത്തിൽ സജീവവും ആരോഗ്യകരവുമായ ജീവിതശൈലി പ്രോത്സാഹിപ്പിക്കുന്നതിനാണ് ഖത്തർ ഫൗണ്ടേഷൻ മുൻഗണന നൽകുന്നത്. കായികരംഗത്ത് യുവ പ്രതിഭകളെ കണ്ടെത്തുന്നതിനും അവർക്ക് കൂടുതൽ അവസരങ്ങൾ നൽകുന്നതിനും ഖത്തർ ഒളിമ്പിക് കമ്മിറ്റിയുടെ (QOC) ദീർഘവീക്ഷണത്തോടെയുള്ള തന്ത്രങ്ങളുമായി ചേർന്നാണ് ഈ സമ്മർ ക്യാമ്പ് പ്രവർത്തിക്കുന്നത്.
​അവധിക്കാലത്ത് കുട്ടികളെ അലസതയിൽ നിന്ന് മോചിപ്പിച്ച്, കൂട്ടായ്മകളിലൂടെയും സൗഹൃദങ്ങളിലൂടെയും പുതിയ കായിക സ്വപ്നങ്ങളിലേക്ക് നയിക്കാൻ 'മുഖായംന' ക്യാമ്പ് ഇതിനകം തന്നെ ഖത്തറിലെ രക്ഷിതാക്കൾക്കിടയിൽ വലിയ ശ്രദ്ധ നേടിക്കഴിഞ്ഞു.