ദോഹ: 2026 ഫിഫ ലോകകപ്പിൽ ഖത്തർ ദേശീയ ഫുട്ബോൾ ടീമിന് (അൽ അന്നാബി) ഗാലറികളിൽ ആവേശകരമായ പിന്തുണ ഉറപ്പാക്കാൻ 'ഖത്തരി ഫാൻസ് ഡെലിഗേഷൻ പ്രോഗ്രാമു'മായി ഖത്തർ ഫുട്ബോൾ അസോസിയേഷനും (QFA) സാമൂഹിക-കായിക സംഭാവന ഫണ്ടും (DAAM). പദ്ധതിയുടെ സാമ്പത്തിക സഹകരണത്തിനായി ഇരുസ്ഥാപനങ്ങളും തമ്മിൽ ധാരണാപത്രത്തിൽ ഒപ്പുവെച്ചു.
​കരാർ പ്രകാരം, ലോകകപ്പ് മത്സരങ്ങൾ നടക്കുന്ന യുണൈറ്റഡ് സ്റ്റേറ്റ്സ്, കാനഡ എന്നിവിടങ്ങളിലേക്ക് ഖത്തരി ആരാധകസംഘത്തെ എത്തിക്കുന്നതിനുള്ള സമഗ്രമായ യാത്രാ പദ്ധതിക്ക് 'ദാം' (DAAM) സാമ്പത്തിക പിന്തുണ നൽകും. ലോകകപ്പിന്റെ ഔദ്യോഗിക എയർലൈൻ പങ്കാളിയായ ഖത്തർ എയർവേസ് വഴിയുള്ള വിമാന ടിക്കറ്റുകൾ, ഹോട്ടൽ താമസം, പ്രാദേശിക ഗതാഗത സൗകര്യങ്ങൾ എന്നിവ ഉൾപ്പെടുന്നതാണ് ഈ പാക്കേജ്.
​ദേശീയ ടീം അംഗങ്ങളുടെ കുടുംബങ്ങൾ, ഔദ്യോഗിക ഫാൻസ് അസോസിയേഷൻ അംഗങ്ങൾ, മാധ്യമപ്രവർത്തകർ, ഖത്തരി ആരാധകർ എന്നിവരടങ്ങുന്ന 1000-ഓളം വരുന്ന സംഘമാണ് ഈ പദ്ധതിക്ക് കീഴിൽ ലോകകപ്പ് വേദികളിലേക്ക് തിരിക്കുക.
​തങ്ങളുടെ പ്രവർത്തന പദ്ധതികൾ സുഗമമായി നടപ്പിലാക്കാനും ആരാധകർക്ക് മികച്ച ലോകകപ്പ് അനുഭവം സമ്മാനിക്കാനും ഈ പിന്തുണ വലിയൊരു ചാലകശക്തിയാകുമെന്ന് ഖത്തർ ഫുട്ബോൾ അസോസിയേഷൻ ജനറൽ സെക്രട്ടറി മൻസൂർ മുഹമ്മദ് അൽ അൻസാരി പറഞ്ഞു. ലോകകപ്പ് പോലൊരു ആഗോള വേദിയിൽ ഖത്തറിന്റെ സാന്നിധ്യവും അടയാളപ്പെടുത്തലും ശക്തമാക്കാനും ആരാധകരുടെ വഴിയിലെ തടസ്സങ്ങൾ നീക്കാനുമാണ് ഈ സംരംഭത്തിലൂടെ ലക്ഷ്യമിടുന്നതെന്ന് ദാം (DAAM) പ്രോഗ്രാം ഡയറക്ടർ ഹസൻ യൂസഫ് അൽ ഉബൈദിലി വ്യക്തമാക്കി.
​ഖത്തർ വിഷൻ 2030-ന്റെ ലക്ഷ്യങ്ങൾക്ക് അനുസൃതമായി, രാജ്യത്തെ കായികമേഖലയെയും ഇത്തരം ജനകീയ കൂട്ടായ്മകളെയും പിന്തുണയ്ക്കുന്നതിൽ ഖത്തർ സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്തിട്ടുള്ള കമ്പനികളും 'ദാം' ഫണ്ടും വഹിക്കുന്ന മുൻനിര പങ്കിന്റെ തെളിവാണ് ഈ പുതിയ കരാർ.