ദോഹ: 2026-ലെ അമീർ കപ്പ് ഫുട്ബോൾ ടൂർണമെന്റിന്റെ ആവേശകരമായ സെമി ഫൈനൽ, ഫൈനൽ പോരാട്ടങ്ങൾക്കുള്ള ഔദ്യോഗിക പന്ത് ഖത്തർ ഫുട്ബോൾ അസോസിയേഷൻ (QFA) പുറത്തിറക്കി. ഖത്തർ ഫുട്ബോൾ അസോസിയേഷന്റെ ഔദ്യോഗിക സോഷ്യൽ മീഡിയ പ്ലാറ്റ്‌ഫോമുകളിലൂടെയാണ് പന്തിന്റെ ചിത്രങ്ങൾ പുറത്തുവിട്ടത്. ആരാധകർക്ക് പ്രിയപ്പെട്ട പന്ത് സ്വന്തമാക്കാൻ പ്രമുഖ ഡെലിവറി ആപ്പായ 'സ്നൂനു' (Snoonu) വഴി സൗകര്യമൊരുക്കിയിട്ടുണ്ട്.ടൂർണമെന്റിലെ ഏറ്റവും നിർണ്ണായകമായ സെമി ഫൈനൽ മത്സരങ്ങൾ ഇന്ന് (ചൊവ്വ) നടക്കും.
ആദ്യ മത്സരത്തിൽ അൽ ഗറാഫ - അൽ വക്രയെ നേരിടും.
രണ്ടാം സെമിയിൽ ചിരവൈരികളായ അൽ സദ്ദും അൽ ദുഹൈലും തമ്മിലാണ് പോരാട്ടം.ഇന്ന് വിജയിക്കുന്ന ടീമുകൾ മെയ് 9-ന് ഖലീഫ ഇന്റർനാഷണൽ സ്റ്റേഡിയത്തിൽ നടക്കുന്ന പ്രൗഢഗംഭീരമായ ഫൈനലിൽ കിരീടത്തിനായി ഏറ്റുമുട്ടും.സെമി ഫൈനൽ മത്സരങ്ങൾ നേരിട്ട് കാണുന്നതിനായുള്ള ടിക്കറ്റുകളുടെ വിതരണം ആരംഭിച്ചതായി ഫുട്ബോൾ അസോസിയേഷൻ അറിയിച്ചു. ആരാധകർക്ക് ക്യു.എഫ്.എ വെബ്സൈറ്റ് വഴിയോ സോഷ്യൽ മീഡിയ ലിങ്കുകൾ വഴിയോ ടിക്കറ്റുകൾ മുൻകൂട്ടി ബുക്ക് ചെയ്യാം. ഖത്തറിലെ ഫുട്ബോൾ പ്രേമികൾ ഏറെ ആവേശത്തോടെ കാത്തിരിക്കുന്ന പോരാട്ടമായതിനാൽ ടിക്കറ്റുകൾ വേഗത്തിൽ വിറ്റുതീരുമെന്നാണ് കണക്കുകൂട്ടുന്നത്.
തത്സമയ ആവേശം നുകരാൻ എല്ലാ കായിക പ്രേമികളെയും സ്റ്റേഡിയത്തിലേക്ക് സ്വാഗതം ചെയ്യുന്നതായി അസോസിയേഷൻ വാർത്താക്കുറിപ്പിൽ അറിയിച്ചു.
