ദോഹ: ഖത്തർ നാഷണൽ വിഷൻ 2030-ന്റെ ഭാഗമായി രാജ്യത്തെ ഉന്നത വിദ്യാഭ്യാസ രംഗത്ത് വൻ മാറ്റങ്ങൾ ലക്ഷ്യമിട്ടുള്ള പുതിയ സർക്കാർ സ്കോളർഷിപ്പ് പദ്ധതി (2026–2027) വിദ്യാഭ്യാസ മന്ത്രാലയം പ്രഖ്യാപിച്ചു. പുതിയ പഠന ശാഖകളും (Academic Pathways) കൂടുതൽ സാമ്പത്തിക സഹായവും ഉൾപ്പെടുത്തിയതാണ് പുതിയ പദ്ധതിയെന്ന് വിദ്യാഭ്യാസ മന്ത്രാലയം അണ്ടർ സെക്രട്ടറി ഡോ. ഇബ്രാഹിം ബിൻ സാലിഹ് അൽ നുഐമി വാർത്താ സമ്മേളനത്തിൽ അറിയിച്ചു.സാമ്പത്തിക വളർച്ച, തുല്യ അവസരം, വൈവിധ്യം, കഴിവുള്ളവരെ കണ്ടെത്തൽ എന്നീ നാല് തൂണുകളിൽ അധിഷ്ഠിതമായാണ് പദ്ധതി വിഭാവനം ചെയ്തിരിക്കുന്നത്.ഭിന്നശേഷിക്കാരായ വിദ്യാർത്ഥികൾക്കായി പ്രത്യേകം സ്കോളർഷിപ്പ് ട്രാക്ക് ഇത്തവണ ഏർപ്പെടുത്തിയിട്ടുണ്ട്. അന്താരാഷ്ട്ര സർവ്വകലാശാലകളിൽ അവർക്ക് അനുയോജ്യമായ പഠന സാഹചര്യം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.രാജ്യത്തിന് ആവശ്യമായ പ്രൊഫഷണലുകളെ സൃഷ്ടിക്കുന്നതിനായി പ്രത്യേക മേഖലകൾക്ക് കൂടുതൽ പ്രാധാന്യം നൽകും.സ്കോളർഷിപ്പ് തുകയിലും മറ്റ് ആനുകൂല്യങ്ങളിലും വർദ്ധനവ് വരുത്തിയിട്ടുണ്ട്.
ദേശീയ വികസനത്തിന് ആവശ്യമായ പ്രഗത്ഭരായ ഒരു യുവതലമുറയെ വാർത്തെടുക്കാനുള്ള വലിയൊരു ചുവടുവെപ്പാണിതെന്ന് ഉന്നത വിദ്യാഭ്യാസ കാര്യ അസിസ്റ്റന്റ് അണ്ടർ സെക്രട്ടറി ഡോ. ഹാരിബ് അൽ ജാബ്രി വ്യക്തമാക്കി. ലോകത്തെ മികച്ച സർവ്വകലാശാലകളിൽ പഠിക്കാൻ ഖത്തറി വിദ്യാർത്ഥികൾക്ക് ഇതിലൂടെ അവസരം ലഭിക്കും.
