​ദോഹ: ഖത്തറിന്റെ തീരദേശ-കടൽ പരിസ്ഥിതിയുടെ സന്തുലിതാവസ്ഥ നിലനിർത്തുന്നതിൽ നിർണായക പങ്ക് വഹിക്കുന്ന കടൽപ്പശുക്കളുടെ (Dugongs) നിരീക്ഷണവും സംരക്ഷണവും കൂടുതൽ ശക്തമാക്കാൻ പരിസ്ഥിതി കാലാവസ്ഥാ വ്യതിയാന മന്ത്രാലയം (MoECC). മേയ് 28-ലെ ലോക കടൽപ്പശു ദിനത്തോടനുബന്ധിച്ച് വെള്ളിയാഴ്ച പുറത്തിറക്കിയ പ്രസ്താവനയിലാണ് മന്ത്രാലയം തങ്ങളുടെ പുതിയ പഠനവിവരങ്ങളും പദ്ധതികളും വ്യക്തമാക്കിയത്.
​ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചറിന്റെ (IUCN) ചുവന്ന പട്ടികയിൽ വംശനാശഭീഷണി നേരിടുന്ന ജീവികളുടെ (Vulnerable) ഗണത്തിലാണ് കടൽപ്പശുക്കളെ ഉൾപ്പെടുത്തിയിരിക്കുന്നത്. ഇവയുടെ സംരക്ഷണത്തിനായി ദേശീയ-പ്രാദേശിക തലങ്ങളിൽ ശക്തമായ ഇടപെടലുകൾ അനിവാര്യമാണെന്ന് മന്ത്രാലയം ചൂണ്ടിക്കാട്ടി. കടൽപ്പുല്ലുകൾ ധാരാളമായി വളരുന്ന ഖത്തറിന്റെ പ്രാദേശിക കടൽത്തീരങ്ങൾ ഈ അപൂർവ്വ ജീവികളുടെ പ്രധാന കേന്ദ്രങ്ങളിലൊന്നാണ്.
കടൽപ്പശുക്കളുടെ എണ്ണവും അവയുടെ സഞ്ചാരപഥങ്ങളും കൃത്യമായി മനസ്സിലാക്കുന്നതിനായി 2023 മുതൽ 2026 വരെയുള്ള കാലയളവിൽ മന്ത്രാലയം വിപുലമായ ശാസ്ത്രീയ-ഫീൽഡ് പഠനം നടത്തിയിരുന്നു. ഈ പഠനത്തിലൂടെ ഖത്തർ തീരങ്ങളിൽ 197 മുതിർന്നവയും 27 കുട്ടികളും ഉൾപ്പെടെ ആകെ 224 കടൽപ്പശുക്കളെ കണ്ടെത്താൻ കഴിഞ്ഞതായി പരിസ്ഥിതി മന്ത്രാലയത്തിലെ പ്രൊട്ടക്ഷൻ ആൻഡ് നേച്ചർ റിസർവ്സ് അഫയേഴ്സ് അസിസ്റ്റന്റ് അണ്ടർസെക്രട്ടറി ഡോ. ഇബ്രാഹിം അൽ മുസ്ലമാനി അറിയിച്ചു.
​ഖത്തറിന്റെ വടക്കുപടിഞ്ഞാറൻ കടൽമേഖല കേന്ദ്രീകരിച്ചായിരുന്നു പ്രധാന പഠനം. അത്യാധുനിക ഏരിയൽ സർവേ സാങ്കേതികവിദ്യകളും ഡ്രോണുകളും ഉപയോഗിച്ചാണ് കടൽപ്പുൽ മേടുകളിലൂടെയുള്ള ഇവയുടെ സഞ്ചാരം നിരീക്ഷിച്ചത്.വംശനാശഭീഷണി നേരിടുന്ന കടൽ ജീവികളെ സംരക്ഷിക്കുന്നതിനും ജൈവവൈവിധ്യം നിലനിർത്തുന്നതിനുമുള്ള ഖത്തറിന്റെ സുസ്ഥിര വികസന ലക്ഷ്യങ്ങളുടെ ഭാഗമായി, പ്രത്യേകിച്ച് പ്രജനന കാലയളവുകളിൽ ഇത്തരം പരിസ്ഥിതി നിരീക്ഷണ പരിപാടികൾ കൂടുതൽ ശക്തമായി തുടരുമെന്ന് ഡോ. അൽ മുസ്ലമാനി ഊന്നിപ്പറഞ്ഞു.