ദോഹ: ജന്മനാ ഹൃദയവൈകല്യമുള്ള (Congenital Heart Defects) കുട്ടികൾക്ക് ജീവൻരക്ഷാ ചികിത്സ ഉറപ്പാക്കുന്നതിനായി മൊറോക്കോയിലെ പ്രമുഖ ആരോഗ്യ സ്ഥാപനമായ ഇബ്ൻ സിന യൂണിവേഴ്സിറ്റി ഹോസ്പിറ്റൽ സെന്ററുമായി ഖത്തർ ചാരിറ്റി (QC) തന്ത്രപ്രധാനമായ സഹകരണ കരാറിൽ ഒപ്പുവെച്ചു. മൊറോക്കോയിലെ ഖത്തർ ചാരിറ്റി ഓഫീസിന്റെ മേൽനോട്ടത്തിലാണ് ഈ സുപ്രധാന പദ്ധതി നടപ്പിലാക്കുന്നത്.
സാധാരണക്കാരായ കുടുംബങ്ങളിലെ കുട്ടികൾക്ക് അത്യാധുനികവും സവിശേഷവുമായ ഹൃദ്രോഗ ചികിത്സ സൗജന്യമായി ലഭ്യമാക്കാനും അവരുടെ ജീവിതനിലവാരം മെച്ചപ്പെടുത്താനും ഈ സംയുക്ത നീക്കത്തിലൂടെ സാധിക്കും.മൊറോക്കോയുടെ ദേശീയ ആരോഗ്യസംവിധാനത്തിന് ഖത്തർ ചാരിറ്റിയുടെ ഈ നീക്കം വലിയൊരു പിന്തുണയാണെന്ന് ഇബ്ൻ സിന യൂണിവേഴ്സിറ്റി ഹോസ്പിറ്റൽ സെന്റർ ഡയറക്ടർ പ്രൊഫസർ റൗഫ് മൊഹ്സിൻ പ്രശംസിച്ചു. മൊറോക്കോയിലെ കുട്ടികളുടെ ആരോഗ്യ സംരക്ഷണത്തോടുള്ള ഖത്തർ ചാരിറ്റിയുടെ പ്രതിബദ്ധതയുടെ തെളിവാണ് ഈ കരാറെന്ന് ഖത്തർ ചാരിറ്റി മൊറോക്കോ ഓഫീസ് ഡയറക്ടർ എഞ്ചിനീയർ മുഹമ്മദ് അബു ഹല്ലൂബ് വ്യക്തമാക്കി.
