ദോഹ:വടക്കുപടിഞ്ഞാറൻ സിറിയയിൽ ദുരിതമനുഭവിക്കുന്ന 540 സ്ത്രീ പുരുഷന്മാർക്ക് തൊഴിൽ പരിശീലനവും സംരംഭകത്വ അവസരങ്ങളും നൽകുന്നതിനായി ഖത്തർ ചാരിറ്റി (QC) വൻകിട വികസന പദ്ധതിക്ക് തുടക്കം കുറിച്ചു. ഷാം ഹ്യുമാനിറ്റേറിയൻ ഫൗണ്ടേഷനുമായി സഹകരിച്ച് നടപ്പിലാക്കുന്ന ഈ പദ്ധതിക്ക് 10 ലക്ഷത്തിലധികം അമേരിക്കൻ ഡോളറാണ് (ഏകദേശം 8.3 കോടിയിലധികം ഇന്ത്യൻ രൂപ) ബജറ്റ് വകയിരുത്തിയിരിക്കുന്നത്. പദ്ധതിയിലൂടെ സ്ത്രീകൾ, അഭയാർത്ഥി ക്യാമ്പുകളിൽ നിന്ന് തിരിച്ചെത്തിയവർ, ഭിന്നശേഷിക്കാർ എന്നിവർക്കാണ് മുൻഗണന നൽകുന്നത്.
"പരിശീലനത്തിൽ നിന്ന് ശാക്തീകരണത്തിലേക്ക്: സുസ്ഥിര തൊഴിലുകളിലേക്ക്" എന്ന് നാമകരണം ചെയ്തിരിക്കുന്ന ഈ പദ്ധതി, വർഷങ്ങൾ നീണ്ട ആഭ്യന്തര സംഘർഷങ്ങൾ മൂലം തകർന്ന ഉപജീവനമാർഗ്ഗങ്ങളെ പുനരുജ്ജീവിപ്പിക്കാൻ ലക്ഷ്യമിടുന്നു. പദ്ധതി നടപ്പിലാക്കുന്ന പ്രദേശങ്ങളിൽ 75 ശതമാനത്തിലധികം ആളുകളും ദാരിദ്ര്യരേഖയ്ക്ക് താഴെയാണ് ജീവിക്കുന്നത്. കൂടാതെ യുവാക്കളിലെ തൊഴിലില്ലായ്മ നിരക്ക് 75ശതമാനത്തിലധികമാണെന്നും സർവ്വേ വ്യക്തമാക്കുന്നു.
അലെപ്പോ (Aleppo), ഇദ്ലിബ് (Idlib), ജിസ്ർ അൽ-ഷുഗൂർ (Jisr al-Shughur), സുറാനിലെ അൽ-അമൽ സിറ്റി (Al-Amal City in Suran) എന്നീ നാല് പ്രധാന കേന്ദ്രങ്ങളിലാണ് പദ്ധതി നടപ്പിലാക്കുന്നത്. പ്രദേശത്തെ തൊഴിൽ വിപണിക്ക് അനുയോജ്യമായ വൊക്കേഷണൽ, ഡിജിറ്റൽ പരിശീലനങ്ങളാണ് നൽകുന്നത്
