ദോഹ:പ്രയാസകരമായ ജീവിതസാഹചര്യങ്ങളിലൂടെ കടന്നുപോകുന്ന ജനവിഭാഗങ്ങൾക്ക് ആശ്വാസമേകി ഖത്തർ ചാരിറ്റി. താൻസാനിയയിലെ പ്വാനി (Pwani) മേഖലയിലെ നിർദ്ധനരായ 161 കുടുംബങ്ങൾക്ക് ഖത്തർ ചാരിറ്റി ഭക്ഷ്യധാന്യക്കിറ്റുകൾ വിതരണം ചെയ്തു. 1,127-ഓളം വരുന്ന ആളുകൾക്കാണ് ഇതിന്റെ പ്രയോജനം ലഭിച്ചത്.
മേഖലയിലെ ഏറ്റവും അർഹരായ നിരാശ്രയർ, അനാഥ കുടുംബങ്ങൾ, കുറഞ്ഞ വരുമാനക്കാർ എന്നിവരെ കണ്ടെത്തിയാണ് അത്യാവശ്യ ഭക്ഷ്യവസ്തുക്കൾ അടങ്ങിയ കിറ്റുകൾ എത്തിച്ചുനൽകിയത്. കാലാവസ്ഥാ വ്യതിയാനം മൂലം ജീവിതോപാധികൾ മുട്ടി പ്രയാസപ്പെടുന്ന പ്വാനിയിലെ സാധാരണക്കാർക്ക് വലിയൊരു കൈത്താങ്ങായി ഈ സഹായം മാറി.
മാനുഷിക പരിഗണന മുൻനിർത്തി ജനങ്ങളുടെ അടിസ്ഥാന ആവശ്യങ്ങൾ കണ്ടറിഞ്ഞു സഹായിക്കുക എന്നത് ഖത്തർ ചാരിറ്റിയുടെ നിഷ്ഠയാണെന്ന് താൻസാനിയയിലെ ഓഫീസ് ഡയറക്ടർ അംജദ് അൽ തഹാൻ പറഞ്ഞു. താൽക്കാലികമായ ഒരു സഹായം എന്നതിലുപരി, അർഹരായവരുടെ ആവശ്യങ്ങൾ മുൻനിർത്തി ഇത്തരം ജീവകാരുണ്യ പ്രവർത്തനങ്ങൾ ഭാവിയിലും കൂടുതൽ ശക്തമായി മുന്നോട്ട് കൊണ്ടുപോകുമെന്നും അദ്ദേഹം കൂട്ടിച്ചേർത്തു.
പ്രാദേശിക കൂട്ടായ്മകളുടെ സഹകരണത്തോടെ കൃത്യമായ സർവേ നടത്തിയാണ് സഹായങ്ങൾ അർഹരിലേക്ക് എത്തിച്ചത്. ദുരിതകാലത്ത് തങ്ങളിലേക്ക് കാരുണ്യത്തിന്റെ കൈകൾ നീട്ടിയ ഖത്തർ ചാരിറ്റിക്കും അതിന് പിന്നിൽ പ്രവർത്തിച്ച ദാതാക്കൾക്കും ലബ്ധഭോക്താക്കളായ കുടുംബങ്ങൾ ഹൃദയം നിറഞ്ഞ നന്ദി അറിയിച്ചു.
