ദോഹ: രാജ്യത്തെ ഗാർഹിക-ചെറുകിട സംരംഭങ്ങളെയും ഉൽപ്പാദന കുടുംബങ്ങളെയും (Productive Families) ശക്തിപ്പെടുത്തുന്നതിനായി ഖത്തർ ചേംബർ പിന്തുണ പ്രഖ്യാപിച്ചു. ഇതുമായി ബന്ധപ്പെട്ട് സാമൂഹിക വികസന-കുടുംബ മന്ത്രാലയ പ്രതിനിധികളുമായി ഖത്തർ ചേംബർ ആക്ടിംഗ് ജനറൽ മാനേജർ അലി സഈദ് ബു ഷെർബാക് അൽ മൻസൂരി ഉന്നതതല ചർച്ച നടത്തി.
മന്ത്രാലയത്തിലെ ഫാമിലി എംപവർമെന്റ് വിഭാഗം ഡയറക്ടർ ബുഥൈന അൽ ഉബൈദ്ലി, എംപവർമെന്റ് സെക്ഷൻ മേധാവി ഗാദ അൽ ഇമാദി, ഫാത്തിമ അൽ മുഹന്നദി എന്നിവരടങ്ങിയ സംഘമാണ് ചേംബർ ആസ്ഥാനത്തെത്തി കൂടിക്കാഴ്ച നടത്തിയത്.
വീടുകൾ കേന്ദ്രീകരിച്ച് പ്രവർത്തിക്കുന്ന സംരംഭകരുടെ ഉൽപന്നങ്ങൾക്കും സേനങ്ങൾക്കും വിപണിയിൽ വലിയ സ്വീകാര്യതയുണ്ടെന്ന് അൽ മൻസൂരി ചൂണ്ടിക്കാട്ടി. ഇവയെ ചെറുകിട-ഇടത്തരം വ്യവസായങ്ങളായി (SMEs) വളർത്തിയെടുക്കാൻ ആവശ്യമായ പരിശീലനങ്ങൾ നൽകുന്നതിനായി ഇരു സ്ഥാപനങ്ങളും തമ്മിൽ ധാരണാപത്രത്തിൽ (MoU) ഒപ്പുവെക്കുന്ന കാര്യം യോഗം ചർച്ച ചെയ്തു.
പ്രൊജക്റ്റ് മാനേജ്മെന്റ്, മാർക്കറ്റിംഗ്, ഡിജിറ്റൽ മാർക്കറ്റിംഗ്, വിലനിർണ്ണയം, ഉപഭോക്തൃ സേവനം, ഉൽപന്ന വികസനം എന്നീ മേഖലകളിൽ മികച്ച പരിശീലനങ്ങൾ നൽകി ഇത്തരം കുടുംബങ്ങളുടെ കഴിവുകൾ വർദ്ധിപ്പിക്കാനും, അവരുടെ ആശയങ്ങളെ വിജയകരമായ ബിസിനസുകളാക്കി മാറ്റാനുമാണ് പദ്ധതിയിലൂടെ ലക്ഷ്യമിടുന്നത്.
