ജനീവ/ദോഹ: സ്വിറ്റ്സർലൻഡിലെ ജനീവയിൽ അറബ്-സ്വിസ് ചേംബർ ഓഫ് കൊമേഴ്സ് ആൻഡ് ഇൻഡസ്ട്രി (CASCI) സംഘടിപ്പിച്ച 'അന്താരാഷ്ട്ര വ്യാപാരത്തിന്റെ അടിസ്ഥാനതത്വങ്ങൾ' (Fundamentals of International Trade) എന്ന പ്രോഗ്രാമിൽ ഖത്തർ ചേംബർ പങ്കെടുത്തു. ഖത്തർ ചേംബർ ഒന്നാം വൈസ് ചെയർമാൻ മുഹമ്മദ് ബിൻ അഹമ്മദ് ബിൻ തവാർ അൽ കുവാരിയുടെ നേതൃത്വത്തിലാണ് ഖത്തറി പ്രതിനിധി സംഘം ചടങ്ങിൽ പങ്കെടുത്തത്.
പരിപാടിയുടെ ഭാഗമായി ലോക വ്യാപാര സംഘടനയുടെ (WTO) ഡയറക്ടർ ജനറൽ ഡോ. എൻഗോസി ഒകോൻജോ-ഇവേലയുമായി അൽ കുവാരി കൂടിക്കാഴ്ച നടത്തി. സാമ്പത്തിക വികസനത്തിൽ സ്വകാര്യ മേഖലയുടെ പങ്കിനെക്കുറിച്ചും നിയമനിർമ്മാണത്തിൽ സ്വകാര്യ മേഖലയുടെ ഉപദേശക പങ്കിനെക്കുറിച്ചും ഇരു നേതാക്കളും ചർച്ച ചെയ്തു.
ആഗോള വ്യാപാര സംവിധാനം, അന്താരാഷ്ട്ര സ്ഥാപനങ്ങൾ, വ്യാപാരം, നിക്ഷേപം, ബൗദ്ധിക സ്വത്തവകാശം എന്നിവയെക്കുറിച്ച് ബിസിനസ്സ് സമൂഹത്തിന് കൂടുതൽ ധാരണ നൽകാനും സഹകരണം വർദ്ധിപ്പിക്കാനും ലക്ഷ്യമിട്ടായിരുന്നു പരിശീലന പരിപാടി.
വേൾഡ് ട്രേഡ് ഓർഗനൈസേഷൻ, ഇന്റർനാഷണൽ ട്രേഡ് സെന്റർ (ITC), വേൾഡ് ഇന്റലക്ച്വൽ പ്രോപ്പർട്ടി ഓർഗനൈസേഷൻ (WIPO) എന്നിവിടങ്ങളിലെ പ്രത്യേക വർക്കിംഗ് സെഷനുകളും യു.എൻ ആസ്ഥാന സന്ദർശനവും പ്രോഗ്രാമിന്റെ ഭാഗമായി നടന്നു. ഖത്തറിലെ സ്വകാര്യ മേഖലയുടെ ആഗോള സാന്നിധ്യം ശക്തമാക്കാനും ആഗോള നിക്ഷേപ പങ്കാളിത്തങ്ങൾ പ്രയോജനപ്പെടുത്താനും ഈ പങ്കാളിത്തം വഴിയൊരുക്കും.
