ദോഹ: ഖത്തർ സെൻട്രൽ ബാങ്കിന്റെ (QCB) ദേശീയ പേയ്‌മെന്റ് കാർഡായ ഹിമ്യാൻ കാർഡ് കുവൈറ്റ്  അംഗീകരിച്ചതായി സെൻട്രൽ ബാങ്ക് പ്രഖ്യാപിച്ചു. ഖത്തർ സെൻട്രൽ ബാങ്കിന്റെ ഉടമസ്ഥതയിലുള്ള ഖത്തറിന്റെ ആദ്യ ദേശീയ വാണിജ്യ ബ്രാൻഡുള്ള പേയ്‌മെന്റ് കാർഡാണ് ഹിമ്യാൻ. മൂന്നാമത് ധനകാര്യ മേഖലാ തന്ത്രത്തിന്റെ ഭാഗമായും ഗൾഫ് സഹകരണ കൗൺസിൽ (GCC) രാജ്യങ്ങൾക്കിടയിലെ സഹകരണം ശക്തിപ്പെടുത്തുന്നതിന്റെയും തുടർച്ചയായാണ് ഈ നീക്കം.എക്‌സ് (X) പ്ലാറ്റ്‌ഫോമിലൂടെയാണ് ഖത്തർ സെൻട്രൽ ബാങ്ക് ഈ വിവരം അറിയിച്ചത്. ഇതനുസരിച്ച്, ഹിമ്യാൻ കാർഡ് ഉടമകൾക്ക് കുവൈറ്റിലുടനീളമുള്ള വിവിധ പോയിന്റ് ഓഫ് സെയിൽ (POS) കേന്ദ്രങ്ങളിലൂടെയും എടിഎമ്മുകളിലൂടെയും വാങ്ങലുകൾ നടത്താനും പണം പിൻവലിക്കാനും കഴിയും. ഏറ്റവും ഉയർന്ന സുരക്ഷാ മാനദണ്ഡങ്ങളും സംരക്ഷണ സംവിധാനങ്ങളും പാലിച്ചാണ് ഈ സേവനങ്ങൾ ലഭ്യമാക്കുന്നതെന്ന് QCB വ്യക്തമാക്കി.ദേശീയ ഹിമ്യാൻ കാർഡ് സേവനങ്ങളുടെ അംഗീകാരം വിദേശ രാജ്യങ്ങളിലേക്കും വ്യാപിപ്പിക്കുന്നത്, ഖത്തറിന്റെ ആഭ്യന്തര പേയ്‌മെന്റ് ഇക്കോസിസ്റ്റത്തിനുള്ളിൽ വിശ്വാസയോഗ്യവും സുരക്ഷിതവുമായ സേവനങ്ങൾ നൽകുന്നതിനുള്ള സെൻട്രൽ ബാങ്കിന്റെ പ്രതിബദ്ധതയെയാണ് പ്രതിഫലിപ്പിക്കുന്നതെന്ന് ബാങ്ക് അറിയിച്ചു. ഈ സംവിധാനം പൂർണമായും ഖത്തർ സെൻട്രൽ ബാങ്ക് നിയന്ത്രിക്കുകയും പ്രവർത്തിപ്പിക്കുകയും ചെയ്യുന്നതാണ്.ഖത്തറിലെ ധനകാര്യ മേഖലയിലെ ഡിജിറ്റൽ പരിവർത്തനം, നവീകരണം, സാങ്കേതിക മുന്നേറ്റം എന്നിവ പ്രോത്സാഹിപ്പിക്കുന്നതിന്റെ ഭാഗമായാണ് ഹിമ്യാൻ കാർഡ് ആരംഭിച്ചത്.സുരക്ഷിതവും കാര്യക്ഷമവുമായ പ്രാദേശിക പേയ്‌മെന്റ് പരിഹാരങ്ങൾ നൽകുന്നതിലൂടെ മേഖലയിലെ സാമ്പത്തിക ഏകീകരണം കൂടുതൽ ശക്തമാക്കുകയാണ് ഈ പദ്ധതിയുടെ ലക്ഷ്യം.