ബാങ്കോക്ക്:അന്താരാഷ്ട്ര നാണയ നിധിയുടെയും (IMF) വേൾഡ് ബാങ്ക് ഗ്രൂപ്പിന്റെയും 2026-ലെ വാർഷിക യോഗങ്ങളുടെ ഭാഗമായി ഖത്തർ സെൻട്രൽ ബാങ്ക് (QCB) ഖത്തറി ബാങ്കുകൾക്കായി വാർഷിക വിരുന്ന് സംഘടിപ്പിച്ചു. തായ്‌ലാന്റിലെ ബാങ്കോക്കിൽ വെച്ചാണ് ചടങ്ങ് നടന്നത്.
ഒക്ടോബർ 12 മുതൽ 18 വരെ നടക്കുന്ന ഐ.എം.എഫ് - ലോകബാങ്ക് യോഗങ്ങളിൽ ആഗോള സാമ്പത്തിക കാഴ്ചപ്പാടുകൾ, വികസന മുൻഗണനകൾ, സാമ്പത്തിക സ്ഥിരത നേരിടുന്ന വെല്ലുവിളികൾ എന്നിവ ചർച്ച ചെയ്യുന്നതിനായി വിവിധ രാജ്യങ്ങളിൽ നിന്നുള്ള ധനകാര്യ പ്രതിനിധികളും സാമ്പത്തിക വിദഗ്ധരും പങ്കെടുക്കുന്നുണ്ട്.
ധനകാര്യ മന്ത്രി അലി ബിൻ അഹമ്മദ് അൽ കുവാരി, ഖത്തർ സെൻട്രൽ ബാങ്ക് ഗവർണർ ശൈഖ് ബന്ദർ ബിൻ മുഹമ്മദ് ബിൻ സൗദ് അൽ ഥാനി എന്നിവർ ചടങ്ങിൽ പങ്കെടുത്തു. ഖത്തറിലെ ധനകാര്യ-ബാങ്കിങ് മേഖലയിലെ പ്രമുഖ സ്ഥാപനങ്ങളുടെ ചെയർമാൻമാർ, ചീഫ് എക്സിക്യൂട്ടീവുകൾ, പ്രതിനിധികൾ, മുതിർന്ന സർക്കാർ ഉദ്യോഗസ്ഥർ, അന്താരാഷ്ട്ര സാമ്പത്തിക സംഘടനാ പ്രതിനിധികൾ എന്നിവരും ചടങ്ങിൽ സംബന്ധിച്ചു.
ഖത്തറി, പ്രാദേശിക, അന്താരാഷ്ട്ര ബാങ്കുകളിലെ ഉന്നത ഉദ്യോഗസ്ഥർക്ക് സാമ്പത്തിക-ബാങ്കിങ് മേഖലകളിലെ പുതിയ പ്രവണതകളും വെല്ലുവിളികളും നയരൂപകർത്താക്കളുമായി ചർച്ച ചെയ്യാനും ആശയവിനിമയം നടത്താനുമുള്ള പ്രധാന വേദിയായാണ് ക്യു.സി.ബി എല്ലാവർഷവും ഈ വാർഷിക വിരുന്ന് ഒരുക്കുന്നത്
