പി വി എ നാസർ
ദോഹ:സ്നേഹത്തിന്റെയും ഐക്യത്തിന്റെയും മഹനീയരൂപമായ കുടുംബം എന്ന സങ്കൽപ്പത്തിന് ആദരമർപ്പിച്ച് ഖത്തർ കുടുംബദിനത്തിൽ രാജ്യത്തെ പ്രധാന പാതകളും സ്മാരകങ്ങളും ഹരിതാഭമായി. ഖത്തറിലെ പൊതുമരാമത്ത് വകുപ്പായ 'അശ്ഗാൽ' ഇന്നലെ (ബുദ്ധനാഴ്ച)രാത്രി നഗരഹൃദയത്തിലെ പ്രധാന ഇടങ്ങളെ പച്ച വെളിച്ചത്തിൽ കുളിപ്പിച്ചത്.
സമൂഹത്തിന്റെ നെടുംതൂണായ കുടുംബബന്ധങ്ങളുടെ പ്രാധാന്യം വിളിച്ചോതുന്നതായിരുന്നു ഈ ദീപാലങ്കാരം. രാജ്യത്തെ പ്രധാന ഗതാഗത ധമനിയായ സബാഹ് അൽ അഹമ്മദ് കോറിഡോറും, ദോഹയുടെ പ്രൗഢി വിളിച്ചോതുന്ന ആർച്ച് ഇന്റർചേഞ്ചും പച്ചപ്പട്ടണിഞ്ഞു നിന്ന കാഴ്ചനയനമനോഹരമായിരുന്നു.മൂല്യങ്ങൾ വളർത്തുന്നതിനും സമൂഹത്തിൽ ഐക്യം നിലനിർത്തുന്നതിനും കുടുംബങ്ങൾ നൽകുന്ന നിസ്തുലമായ സംഭാവനകളെ ഈ പ്രതീകാത്മകമായ തിളക്കം ഓർമ്മിപ്പിച്ചു. എല്ലാ വർഷവും ഏപ്രിൽ 15-ന് ആചരിക്കുന്ന ഖത്തർ കുടുംബദിനം കുടുംബഭദ്രതയ്ക്കും സാമൂഹിക സുരക്ഷിതത്വത്തിനും രാജ്യം നൽകുന്ന വലിയ പ്രാധാന്യത്തിന്റെ അടയാളം കൂടിയാണ്.
ബന്ധങ്ങളുടെ ഊഷ്മളതയും പരസ്പര സ്നേഹവും ഊട്ടിയുറപ്പിക്കാൻ ആഹ്വാനം ചെയ്തുകൊണ്ട് ദോഹയുടെ വഴിയോരങ്ങൾ ഹരിതപ്രഭയിൽ തിളങ്ങിനിന്നു.
