ദോഹ: ഖത്തറിൽ രൂപംകൊണ്ട പേറോൾ ഫിൻടെക് കമ്പനിയായ 'ലയബിഫൈ' (Liabify) തങ്ങളുടെ സേവനങ്ങൾ ജി.സി.സി രാജ്യങ്ങളിലേക്ക് വ്യാപിപ്പിക്കുന്നു. തൊഴിലാളികളുടെ ശമ്പള വിതരണവും സാമ്പത്തിക ക്ഷേമവും ലക്ഷ്യമിട്ടുള്ള നൂതന സാങ്കേതിക വിദ്യയുമായാണ് കമ്പനി അന്താരാഷ്ട്ര തലത്തിലേക്ക് വളരുന്നത്.ഡോ. അലൻ വില്ലെഗാസ്, മൈക്കൽ ജാവിയർ, അബ്ദുൾ റഷീദ് എന്നിവർ ചേർന്ന് ഖത്തറിലാണ് 'ലയബിഫൈ' സ്ഥാപിച്ചത്. ഖത്തറിലെ ഡിജിറ്റൽ ഇൻകുബേഷൻ സെന്റർ (DIC), ഖത്തർ സയൻസ് ആൻഡ് ടെക്നോളജി പാർക്ക് (QSTP) എന്നിവിടങ്ങളിലെ പിന്തുണയോടെയാണ് ഈ സ്റ്റാർട്ടപ്പ് വളർന്നത്. ഇടത്തരം വരുമാനക്കാരായ തൊഴിലാളികൾക്ക് അവരുടെ ശമ്പളം ലഭിക്കുന്നതിന് മുൻപ് തന്നെ ജോലി ചെയ്ത ദിവസങ്ങളിലെ വരുമാനം (Earned Wage Access) ആവശ്യാനുസരണം പിൻവലിക്കാനും മറ്റ് സാമ്പത്തിക സേവനങ്ങൾ ഉപയോഗിക്കാനും ഈ പ്ലാറ്റ്‌ഫോം സഹായിക്കുന്നു.പ്രാദേശിക വിപണിയിൽ നിന്ന് ജി.സി.സി തലത്തിലേക്ക് വളരുന്നതിന്റെ ഭാഗമായി യു.എ.ഇയിലെ പ്രമുഖ ധനകാര്യ സ്ഥാപനമായ 'മവാരിദ് ഫിനാൻസു'മായി ലയബിഫൈ കരാറൊപ്പിട്ടു. ഇതിലൂടെ 'LiaPay' എന്ന പേരിൽ AI അധിഷ്ഠിത പ്രീപെയ്ഡ് പ്ലാറ്റിനം കാർഡുകൾ പുറത്തിറക്കും. ഷരിയ നിയമങ്ങൾ പാലിച്ചുകൊണ്ടുള്ള ഈ സേവനം വഴി തൊഴിലാളികൾക്ക് തങ്ങളുടെ വരുമാനം കൈകാര്യം ചെയ്യാനും പണം അയക്കാനുമുള്ള സൗകര്യം ലഭിക്കും.
