ദോഹ: ഖത്തറും ഉസ്‌ബെക്കിസ്ഥാനും തമ്മിൽ സൈനിക-പ്രതിരോധ മേഖലകളിൽ സഹകരണം ശക്തമാക്കുന്നതിനായുള്ള തന്ത്രപ്രധാനമായ ധാരണാപത്രത്തിൽ (MoU) ഒപ്പുവെച്ചു. ഔദ്യോഗിക സന്ദർശനത്തിനായി ഖത്തറിലെത്തിയ ഉസ്‌ബെക്കിസ്ഥാൻ പ്രതിരോധ മന്ത്രി ലെഫ്റ്റനന്റ് ജനറൽ ഷുഖ്രത് ഖോൽമുഖമെദോവുമായി (Shukhrat Kholmukhamedov) ഖത്തർ ഉപപ്രധാനമന്ത്രിയും പ്രതിരോധ കാര്യ സഹമന്ത്രിയുമായ ഷെയ്ഖ് സൗദ് ബിൻ അബ്ദുൽറഹ്മാൻ ബിൻ ഹസ്സൻ അൽ താനി നടത്തിയ കൂടിക്കാഴ്ചയിലാണ് കരാർ ഒപ്പുവെച്ചത്.
വ്യാഴാഴ്ച ദോഹയിൽ നടന്ന കൂടിക്കാഴ്ചയിൽ ഇരുരാജ്യങ്ങളും തമ്മിലുള്ള സൈനിക സഹകരണം, സംയുക്ത ഏകോപനം എന്നിവയെക്കുറിച്ചുള്ള വിവിധ വശങ്ങൾ ഇരുനേതാക്കളും ചർച്ച ചെയ്തു. നിലവിലെ പ്രാദേശിക സാഹചര്യങ്ങളുടെ പശ്ചാത്തലത്തിൽ മിഡിൽ ഈസ്റ്റിലെ ഏറ്റവും പുതിയ സുരക്ഷാ സംഭവവികാസങ്ങളും കോംബാറ്റ് അപ്‌ഡേറ്റുകളും യോഗം വിലയിരുത്തി.
ഖത്തർ പ്രതിരോധ മന്ത്രാലയവും ഉസ്‌ബെക്കിസ്ഥാൻ പ്രതിരോധ മന്ത്രാലയവും തമ്മിലുള്ള ഉഭയകക്ഷി ബന്ധത്തിൽ പുതിയ അധ്യായം കുറിക്കുന്നതാണ് ഈ സുപ്രധാന ധാരണാപത്രം. ഇരുരാജ്യങ്ങളിലെയും പ്രതിരോധ മന്ത്രാലയങ്ങളിലെ പ്രമുഖ ഉദ്യോഗസ്ഥരും മുതിർന്ന സൈനിക ഉദ്യോഗസ്ഥരും ചടങ്ങിൽ സംബന്ധിച്ചു.
