ദോഹ:പശ്ചിമേഷ്യയിലെ സംഘർഷാവസ്ഥ ലഘൂകരിക്കാനും മേഖലയിൽ സ്ഥിരത ഉറപ്പാക്കാനുമുള്ള സംയുക്ത ശ്രമങ്ങളെക്കുറിച്ച് ഖത്തർ അമീർ ഷെയ്ഖ് തമീം ബിൻ ഹമദ് അൽ താനിയും തുർക്കി പ്രസിഡന്റ് റജബ് തയ്യിബ് എർദോഗാനും ചർച്ച നടത്തി. ബുധനാഴ്ച നടന്ന ടെലിഫോൺ സംഭാഷണത്തിൽ ഇരുനേതാക്കളും പ്രാദേശികവും അന്തർദേശീയവുമായ സുപ്രധാന വിഷയങ്ങൾ വിലയിരുത്തി.ഖത്തർ സായുധ സേനയുടെ ഹെലികോപ്റ്റർ അപകടത്തിൽപ്പെട്ടതിലുള്ള അഗാധമായ ദുഃഖം പ്രസിഡന്റ് എർദോഗാൻ അമീറിനെ അറിയിച്ചു. അപകടത്തിൽ വീരമൃത്യു വരിച്ച സൈനികർക്ക് അദ്ദേഹം അനുശോചനം രേഖപ്പെടുത്തുകയും, അവരുടെ കുടുംബങ്ങൾക്ക് ക്ഷമയും ആശ്വാസവും ലഭിക്കട്ടെയെന്ന് പ്രാർത്ഥിക്കുകയും ചെയ്തു.മേഖലയിലെ സൈനിക നീക്കങ്ങൾ അവസാനിപ്പിക്കാൻ തുർക്കി നടത്തുന്ന ഇടപെടലുകൾക്ക് അമീർ നന്ദി അറിയിച്ചു. നിലവിലെ അസ്ഥിരമായ സാഹചര്യം ഒഴിവാക്കി സമാധാനം കൊണ്ടുവരാൻ ഇരുരാജ്യങ്ങളും തമ്മിലുള്ള നയതന്ത്ര ഏകോപനം തുടരാൻ ചർച്ചയിൽ തീരുമാനമായി.മേഖലയിലെ സംഘർഷം കുറയ്ക്കാൻ ഖത്തറും തുർക്കിയും സംയുക്തമായി പ്രവർത്തിക്കും.ഇരുരാജ്യങ്ങളും തമ്മിലുള്ള സഹകരണം കൂടുതൽ ശക്തമാക്കുന്നതിനെക്കുറിച്ച് നേതാക്കൾ ആശയവിനിമയം നടത്തി.
