ദോഹ/​റിയാദ്: ഖത്തർ വിദേശകാര്യ മന്ത്രാലയത്തിലെ സഹമന്ത്രി ഡോ. മുഹമ്മദ് ബിൻ അബ്ദുൽ അസീസ് ബിൻ സാലിഹ് അൽ ഖുലൈഫി സൗദി അറേബ്യൻ വിദേശകാര്യ ഉപമന്ത്രി എൻജിനീയർ വലീദ് ബിൻ അബ്ദുൽ കരീം അൽ ഖെറൈജിയുമായി റിയാദിൽ കൂടിക്കാഴ്ച നടത്തി. തിങ്കളാഴ്ച നടന്ന യോഗത്തിൽ ഇരുരാജ്യങ്ങളും തമ്മിലുള്ള ഉഭയകക്ഷി ബന്ധങ്ങളും വിവിധ മേഖലകളിൽ സഹകരണം കൂടുതൽ ശക്തമാക്കാനുള്ള വഴികളും ഇരുനേതാക്കളും അവലോകനം ചെയ്തു.
​മേഖലയിലെ ഏറ്റവും പുതിയ രാഷ്ട്രീയ വികാസങ്ങൾ, പ്രത്യേകിച്ച് അമേരിക്കയും ഇറാനും തമ്മിൽ രൂപീകരിച്ച പുതിയ കരാർ ചർച്ചയിൽ പ്രധാന വിഷയമായി. കൂടാതെ സിറിയ, സുഡാൻ, സൊമാലിയ എന്നിവിടങ്ങളിലെ നിലവിലെ സാഹചര്യങ്ങളും യോഗം വിലയിരുത്തി.
​സൈനിക നടപടികൾ അവസാനിപ്പിക്കുന്നതിനും ഹോർമൂസ് ഇടുക്കിലൂടെയുള്ള (Strait of Hormuz) സുരക്ഷിതമായ കപ്പൽ ഗതാഗതം ഉറപ്പാക്കുന്നതിനുമായി അമേരിക്കയും ഇറാനും തമ്മിൽ ഉണ്ടാക്കിയ കരാറിൽ ഇരുരാജ്യങ്ങളും പൂർണ്ണ സംതൃപ്തി രേഖപ്പെടുത്തി. സുസ്ഥിരമായ സമാധാനം ഉറപ്പാക്കുന്നതിനും പ്രാദേശികവും അന്തർദ്ദേശീയവുമായ സാമ്പത്തിക വളർച്ച പ്രോത്സാഹിപ്പിക്കുന്നതിനും ഈ കരാർ നിർണ്ണായക ചുവടുവെപ്പാണെന്ന് ഇരുനേതാക്കളും വിലയിരുത്തി.
​പ്രാദേശിക സുരക്ഷയും സ്ഥിരതയും മെച്ചപ്പെടുത്തുന്നതിനും, നിലനിൽക്കുന്ന പ്രശ്നങ്ങൾക്ക് ചർച്ചകളിലൂടെയും സമാധാനപരമായ മാർഗ്ഗങ്ങളിലൂടെയും സുസ്ഥിരമായ പരിഹാരം കാണുന്നതിനുമുള്ള എല്ലാ ശ്രമങ്ങൾക്കും ഖത്തറും സൗദിയും തങ്ങളുടെ പൂർണ്ണ പിന്തുണ ആവർത്തിച്ചു പ്രഖ്യാപിച്ചു. അന്താരാഷ്ട്ര നിയമങ്ങളുടെയും നല്ല അയൽപക്ക ബന്ധങ്ങളുടെയും തത്ത്വങ്ങൾക്ക് അനുസൃതമായിരിക്കണം ഇത്തരം നീക്കങ്ങളെന്നും നേതാക്കൾ കൂട്ടിച്ചേർത്തു.