ദോഹ: സൊമാലിയയുടെ ഭാഗമായ 'സൊമാലിലാൻഡിൽ' ഇസ്രായേൽ നയതന്ത്ര പ്രതിനിധിയെ നിയമിച്ച നടപടിയെ ഖത്തർ ഉൾപ്പെടെയുള്ള 15 അറബ്-ഇസ്‌ലാമിക രാജ്യങ്ങൾ ശക്തമായി അപലപിച്ചു. സൊമാലിയയുടെ പരമാധികാരത്തിനും ഐക്യത്തിനും പ്രാദേശിക അഖണ്ഡതയ്ക്കും മേലുള്ള കടന്നുകയറ്റമാണ് ഇതെന്ന് രാജ്യങ്ങൾ സംയുക്ത പ്രസ്താവനയിൽ വ്യക്തമാക്കി.
ഖത്തർ, കുവൈത്ത്, സൗദി അറേബ്യ, ഈജിപ്ത്, സൊമാലിയ, സുഡാൻ, ലിബിയ, ബംഗ്ലാദേശ്, അൾജീരിയ, പലസ്തീൻ, തുർക്കി, ഇന്തോനേഷ്യ, പാകിസ്ഥാൻ, മൗറിട്ടേനിയ, ജോർദാൻ, ഒമാൻ എന്നീ രാജ്യങ്ങളിലെ വിദേശകാര്യ മന്ത്രിമാരാണ് പ്രതിഷേധം അറിയിച്ചത്.
ഒരു രാജ്യത്തിന്റെ ഐക്യത്തെയോ പരമാധികാരത്തെയോ ചോദ്യം ചെയ്യുന്ന തരത്തിലുള്ള ഏകപക്ഷീയമായ എല്ലാ നടപടികളെയും തള്ളിക്കളയുന്നതായി മന്ത്രിമാർ വ്യക്തമാക്കി.
സൊമാലിയയുടെ ഐക്യത്തിനും അഖണ്ഡതയ്ക്കും തങ്ങൾ പൂർണ്ണ പിന്തുണ നൽകുന്നു. സൊമാലിയൻ ജനതയുടെ താൽപ്പര്യങ്ങൾ പ്രതിനിധീകരിക്കുന്ന ഏക നിയമപരമായ രൂപം സൊമാലിയൻ ഔദ്യോഗിക സ്ഥാപനങ്ങളാണെന്ന് അവർ ഊന്നിപ്പറഞ്ഞു.
ഇസ്രായേലിന്റെ ഈ നീക്കം അന്താരാഷ്ട്ര നിയമങ്ങളുടെയും യുഎൻ ചാർട്ടറിന്റെയും ആഫ്രിക്കൻ യൂണിയൻ നിയമങ്ങളുടെയും നഗ്നമായ ലംഘനമാണ്.
ഹോൺ ഓഫ് ആഫ്രിക്ക മേഖലയുടെ സ്ഥിരതയെ തകർക്കുന്ന അപകടകരമായ കീഴ്വഴക്കമാണിതെന്നും ഇത് പ്രാദേശിക സമാധാനത്തെയും സുരക്ഷയെയും ദോഷകരമായി ബാധിക്കുമെന്നും മന്ത്രിമാർ മുന്നറിയിപ്പ് നൽകി.
