​ദോഹ: രാജ്യത്തിന്റെ പ്രകൃതിവിഭവങ്ങൾ സംരക്ഷിക്കുന്നതിനായുള്ള കർശന നടപടികളുമായും, ആഗോള സാങ്കേതിക വിദ്യയിൽ കരുത്ത് തെളിയിച്ചും ഖത്തർ മുന്നോട്ട്. പരിസ്ഥിതി നിയമങ്ങൾ പാലിക്കുന്നുണ്ടെന്ന് ഉറപ്പാക്കാൻ മന്ത്രാലയം ഫീൽഡ് പരിശോധനകൾ ശക്തമാക്കിയപ്പോൾ, ദുബായിൽ നടന്ന ലോക ഗവൺമെന്റ് ഉച്ചകോടിയിൽ എഐ (AI)നയരൂപീകരണത്തിൽ ഖത്തർ നിർണ്ണായക പങ്കുവഹിച്ചു.
​പരിസ്ഥിതി നിയമലംഘനം തടയാൻ മന്ത്രാലയത്തിന്റെ കർശന പരിശോധന
​പരിസ്ഥിതി കാലാവസ്ഥാ വ്യതിയാന മന്ത്രാലയത്തിന്റെ നേതൃത്വത്തിൽ രാജ്യത്തെ വിവിധ വ്യവസായ കേന്ദ്രങ്ങളിലും പദ്ധതി പ്രദേശങ്ങളിലും വ്യാപകമായ ഫീൽഡ് പരിശോധനകൾ നടത്തി. മന്ത്രാലയത്തിലെ എൻവയോൺമെന്റൽ അസസ്‌മെന്റ് ആൻഡ് പെർമിറ്റ്‌സ് വകുപ്പാണ് പരിശോധനയ്ക്ക് നേതൃത്വം നൽകിയത്.
​അംഗീകൃതമായ പരിസ്ഥിതി നിബന്ധനകൾ സ്ഥാപനങ്ങൾ കൃത്യമായി പാലിക്കുന്നുണ്ടോ എന്ന് ഉറപ്പുവരുത്തുകയായിരുന്നു പരിശോധനയുടെ പ്രധാന ലക്ഷ്യം. പ്രകൃതിവിഭവങ്ങൾ സംരക്ഷിക്കുന്നതിനൊപ്പം മലിനീകരണം കുറയ്ക്കാനാവശ്യമായ നടപടികൾ സ്വീകരിക്കാനും മന്ത്രാലയം നിർദ്ദേശം നൽകി. വരും ദിവസങ്ങളിലും ഇത്തരം പീരിയോഡിക് ഇൻസ്പെക്ഷനുകൾ തുടരുമെന്ന് അധികൃതർ വ്യക്തമാക്കി.
എഐ സന്നദ്ധതയുമായി ഖത്തർ
​ദുബായിൽ നടന്ന ലോക ഗവൺമെന്റ് ഉച്ചകോടി 2026-നോടനുബന്ധിച്ച് നടന്ന ഉന്നതതല ചർച്ചയിൽ ഖത്തർ ധനകാര്യ മന്ത്രി അലി ബിൻ അഹമ്മദ് അൽ കുവാരി പങ്കെടുത്തു. 'എഐ പ്രയോജനപ്പെടുത്തലും ദേശീയ സന്നദ്ധത വർധിപ്പിക്കലും' എന്ന വിഷയത്തിലൂന്നിയായിരുന്നു ചർച്ചകൾ.
​നിർമ്മാണ-ഉൽപ്പാദന മേഖലകളിൽ ആർട്ടിഫിഷ്യൽ ഇന്റലിജൻസ് കൊണ്ടുവരുന്ന വിപ്ലവകരമായ മാറ്റങ്ങളെക്കുറിച്ച് മന്ത്രി സംസാരിച്ചു. എഐ തൊഴിൽ വിപണിയിൽ ചെലുത്തുന്ന സ്വാധീനം കണക്കിലെടുത്ത് തൊഴിലാളികൾക്ക് പുതിയ നൈപുണ്യ വികസന പരിശീലനങ്ങൾ നൽകേണ്ടതിന്റെ ആവശ്യകത സെഷനിൽ ചർച്ചയായി. ഡിജിറ്റൽ വിടവ് നികത്തുന്നതിനും സാമ്പത്തിക മേഖലയിൽ എഐ സുരക്ഷിതമായി ഉപയോഗിക്കുന്നതിനുമുള്ള നയരൂപീകരണത്തിന് ഖത്തർ മുൻഗണന നൽകുന്നതായും അദ്ദേഹം അറിയിച്ചു