കൊച്ചി: പുനർജനി പ്രളയ പുനരധിവാസ പദ്ധതിയുടെ പേരിൽ വിദേശ സംഭാവന തേടിയെന്ന പരാതിയിൽ സിബിഐ അന്വേഷണം ശുപാർശ ചെയ്തിട്ടും വിജിലൻസ് ഫയൽ അടച്ചെന്ന് കേരള ഹൈക്കോടതിയിൽ ഹർജി. മുഖ്യമന്ത്രി വി.ഡി. സതീശനും മനപ്പാട്ട് ഫൗണ്ടേഷൻ ചെയർമാൻ അമീർ അഹമ്മദിനുമെതിരായ നടപടി അവസാനിപ്പിച്ച വിജിലൻസ് റിപ്പോർട്ട് റദ്ദാക്കണമെന്നാണ് ഹർജിയിലെ ആവശ്യം.
2018-ലെ പ്രളയത്തിൽ ദുരിതമനുഭവിച്ച പറവൂരിലെ കുടുംബങ്ങളെ സഹായിക്കാനാണ്, അന്ന് പറവൂർ എംഎൽഎയായിരുന്ന സതീശൻ പുനർജനി പദ്ധതി ആരംഭിച്ചത്. 2018 ഒക്ടോബറിലെ സ്വകാര്യ യു.കെ യാത്രയ്ക്കിടെ പദ്ധതിക്കായി 22,500 പൗണ്ട് സമാഹരിക്കാൻ സതീശൻ ശ്രമിച്ചെന്നും വിദേശ സംഭാവന മനപ്പാട്ട് ഫൗണ്ടേഷൻ വഴി കൈകാര്യം ചെയ്തെന്നുമാണ് ഹർജിയിലെ ആരോപണം. ഇത് വിദേശ സംഭാവന (നിയന്ത്രണ) നിയമത്തിന്റെയും കേരള നിയമസഭയുടെ നടപടിച്ചട്ടങ്ങളുടെയും ലംഘനമാണെന്ന് ഹർജിക്കാരൻ വാദിക്കുന്നു.
വിദേശ സംഭാവന സ്വീകരിക്കുന്ന അക്കൗണ്ട്, കറന്റ് അക്കൗണ്ട്, വ്യക്തിഗത ബാങ്ക് അക്കൗണ്ടുകൾ എന്നിവയിലായി 1.22 കോടി രൂപയിലധികം വരുന്ന ഇടപാടുകളിൽ സംശയം രേഖപ്പെടുത്തിയ അന്നത്തെ വിജിലൻസ് ഡയറക്ടർ സിബിഐ അന്വേഷണം ശുപാർശ ചെയ്തെന്നാണ് ഹർജിയിൽ പറയുന്നത്. ഡയറക്ടറെ മാറ്റിയശേഷം ‘വിജിലൻസ് അന്വേഷണത്തിന് വിഷയമില്ല’ എന്ന നിഗമനത്തിൽ ഫയൽ അടച്ചെന്നും നിയമസഭാ തിരഞ്ഞെടുപ്പ് ഫലം വന്നതിന് തൊട്ടുപിന്നാലെയാണ് സതീശനെതിരായ നടപടി അവസാനിപ്പിച്ചതെന്നും ഹർജിയിൽ ആരോപിക്കുന്നു.
പ്രാഥമിക പരിശോധനാ റിപ്പോർട്ടിന്റെയും സിബിഐ അന്വേഷണ ശുപാർശയുടെയും അടിസ്ഥാനത്തിൽ നിയമാനുസൃത തുടർനടപടി സ്വീകരിക്കാൻ വിജിലൻസിന് നിർദേശം നൽകണമെന്നും ഹർജിയിൽ ആവശ്യപ്പെട്ടിട്ടുണ്ട്. കേസുമായി ബന്ധപ്പെട്ട ചില രേഖകൾ മുദ്രവച്ച കവറിൽ ഹാജരാക്കണമെന്നാണ് ഇടക്കാല ആവശ്യം.
ജസ്റ്റിസ് സി. ജയചന്ദ്രന്റെ ബെഞ്ചിനു മുന്നിൽ നവംബർ 16 തിങ്കളാഴ്ച ഹർജി പരിഗണനയ്ക്കായി പട്ടികപ്പെടുത്തിയിട്ടുണ്ട്.