സോഷ്യൽ മീഡിയയിൽ വീണ്ടും വൈറലായി ഒരു ട്രെയിൻ വീഡിയോ. ഓടിക്കൊണ്ടിരുന്ന ട്രെയിനിന്റെ കോച്ചിനുള്ളിൽ പൂജാ ചടങ്ങുകൾ നടക്കുന്ന ദൃശ്യങ്ങളാണ് ഇത്തവണ ചർച്ചയായത്. ട്രെയിനിൽ ഇത്തരമൊരു ചടങ്ങ് നടത്തുന്നത് നിയമാനുസൃതമാണോ എന്ന ചോദ്യവുമായി നിരവധി പേർ രംഗത്തെത്തിയതോടെയാണ് സംഭവത്തിൽ നോർത്തേൺ റെയിൽവേ വിശദീകരണം നൽകിയത്. എക്‌സിൽ പ്രചരിച്ച വീഡിയോയിൽ വെള്ളവസ്ത്രം ധരിച്ച ഭക്തർക്കൊപ്പം ഒരു പൂജാരി ട്രെയിൻ കോച്ചിനുള്ളിൽ പൂജ നിർവഹിക്കുന്നതാണ് കാണുന്നത്. ഇതോടെ സംഭവം വ്യാപകമായി ചർച്ചയാവുകയും റെയിൽവേയുടെ പ്രതികരണം തേടുകയും ചെയ്തു.

വീഡിയോയിൽ കാണുന്ന കോച്ച് സാധാരണ യാത്രക്കാർ ഉപയോഗിക്കുന്ന കോച്ചല്ലെന്ന് നോർത്തേൺ റെയിൽവേ വ്യക്തമാക്കി. ഐആർസിടിസി മുഖേന ഒരു സ്വകാര്യ സംഘം മുൻകൂട്ടി ബുക്ക് ചെയ്ത പ്രത്യേക സലൂൺ കാർ ആയിരുന്നു അത്. ഉന്നത ഉദ്യോഗസ്ഥർക്കും വി.ഐ.പി. യാത്രകൾക്കുമായി ഒരുക്കിയിരിക്കുന്ന ഈ ആഡംബര കോച്ചുകളിൽ എയർകണ്ടീഷൻ ചെയ്ത കിടപ്പുമുറികൾ, ലിവിംഗ് റൂം, ഡൈനിംഗ് ഏരിയ, അടുക്കള, അറ്റാച്ച്ഡ് ബാത്ത്റൂമുകൾ തുടങ്ങിയ സൗകര്യങ്ങൾ ലഭ്യമാണ്.

റിപ്പോർട്ടുകൾ പ്രകാരം, 3,08,580 രൂപ അഡ്വാൻസ് നൽകിയാണ് സ്വകാര്യ സംഘം സലൂൺ കാർ ബുക്ക് ചെയ്തത്. ജൂലൈ 10-ന് ന്യൂഡൽഹിയിൽ നിന്ന് മുംബൈയിലേക്ക് സർവീസ് നടത്തിയ 12926 പശ്ചിം എക്സ്പ്രസിനൊപ്പമാണ് ഈ കോച്ച് ഘടിപ്പിച്ചിരുന്നത്. സംഭവത്തിൽ യാത്രക്കാരുടെ സുരക്ഷയ്ക്കോ ട്രെയിൻ സർവീസിന്റെ കൃത്യനിഷ്ഠയ്ക്കോ യാതൊരു പ്രശ്നവും ഉണ്ടായിട്ടില്ലെന്ന് റെയിൽവേ അറിയിച്ചു. സുരക്ഷയും സമയപാലനവും ഉറപ്പാക്കുക എന്നതാണ് റെയിൽവേയുടെ പ്രഥമ ഉത്തരവാദിത്തമെന്നും, അതിൽ വിട്ടുവീഴ്ച ഉണ്ടാകില്ലെന്നും നോർത്തേൺ റെയിൽവേ എക്‌സിലൂടെ വ്യക്തമാക്കി.

വീഡിയോയിൽ കണ്ട പൂജ സ്വകാര്യമായി ബുക്ക് ചെയ്ത സലൂൺ കാറിനുള്ളിൽ നടന്ന ചടങ്ങിന്റെ ഭാഗമാണെന്നും, സംഭവത്തിൽ ആർക്കും പരിക്കോ മറ്റ് അസൗകര്യങ്ങളോ ഉണ്ടായിട്ടില്ലെന്നും റെയിൽവേ വിശദീകരിച്ചു.