തിരുവനന്തപുരം: പട്ടികജാതി-പട്ടികവർഗ വിഭാഗത്തിൽപ്പെട്ട വനിതകളുടെ സംരംഭകത്വം പ്രോത്സാഹിപ്പിക്കുന്നതിനായി പലിശരഹിത വായ്പാ പദ്ധതിയുമായി സംസ്ഥാന സർക്കാർ. 'പ്രിയദർശിനി' എന്ന പേരിൽ ആരംഭിക്കുന്ന പദ്ധതി സൂക്ഷ്മ-ചെറുകിട സംരംഭങ്ങൾ ആരംഭിക്കാനും വികസിപ്പിക്കാനുമാണ് ലക്ഷ്യമിടുന്നത്. സംസ്ഥാന സർക്കാരിന്റെ നൂറുദിന കർമപരിപാടിയുടെ ഭാഗമായി കേരള സംസ്ഥാന പിന്നാക്ക വിഭാഗ വികസന കോർപ്പറേഷൻ സംഘടിപ്പിക്കുന്ന 'സമഗ്ര 2026' എന്ന സംസ്ഥാനതല പരിപാടിയിൽ പദ്ധതിയുടെ ഔദ്യോഗിക പ്രഖ്യാപനം നടക്കും. ജൂലൈ 23-ന് കൊച്ചി പള്ളുരുത്തി എസ്.എൻ. ഓഡിറ്റോറിയത്തിൽ മുഖ്യമന്ത്രി വി.ഡി. സതീശൻ ഉദ്ഘാടനം നിർവഹിക്കുമെന്ന് പട്ടികജാതി, പട്ടികവർഗ-പിന്നാക്ക ക്ഷേമ മന്ത്രി കെ.എ. തുളസി വാർത്താസമ്മേളനത്തിൽ അറിയിച്ചു.

നൂറുദിന കർമപരിപാടിയുടെ ഭാഗമായി പട്ടികജാതി, പട്ടികവർഗ-പിന്നാക്ക ക്ഷേമ വകുപ്പുകൾ ചേർന്ന് ആകെ 31 പദ്ധതികളാണ് നടപ്പാക്കുന്നത്. ഇതിൽ മൂന്ന് പദ്ധതികൾ കേരള സംസ്ഥാന പിന്നാക്ക വിഭാഗ വികസന കോർപ്പറേഷന്റെ നേതൃത്വത്തിലായിരിക്കും. ആദ്യഘട്ടത്തിൽ 100 ദിവസത്തിനകം 16,000 ഗുണഭോക്താക്കൾക്ക് 200 കോടി രൂപയുടെ വായ്പാ ധനസഹായം നൽകാനാണ് സർക്കാർ ലക്ഷ്യമിടുന്നത്.

'പ്രിയദർശിനി' പദ്ധതിക്കൊപ്പം, സർക്കാർ സർവീസിൽ നിന്ന് വിരമിച്ചവർക്കായി 'സീനിയർ സെക്യുർ' എന്ന പുതിയ വായ്പാ പദ്ധതിയും പ്രഖ്യാപിക്കും. ഇരുപദ്ധതികളും നൂറുദിവസത്തിനകം പ്രാബല്യത്തിൽ വരും.

വായ്പാ വിതരണത്തോടൊപ്പം സംരംഭകർക്കായി ബോധവത്കരണ ക്ലാസുകൾ, സർക്കാർ സേവനങ്ങളെക്കുറിച്ചുള്ള ഇൻഫർമേഷൻ കിയോസ്‌കുകൾ, പ്രദർശനങ്ങൾ എന്നിവയും പരിപാടിയുടെ ഭാഗമാകും. രാവിലെ 9 മുതൽ രാത്രി 8 വരെ നടക്കുന്ന പരിപാടിയിലേക്ക് പൊതുജനങ്ങൾക്ക് സൗജന്യ പ്രവേശനമാണ്.

കേരളമെമ്പാടുമുള്ള 50-ലധികം കുടുംബശ്രീ സി.ഡി.എസ്-കളിലെയും വിവിധ എൻജിഒകളിലെയും 15,000-ത്തിലധികം ഗുണഭോക്താക്കൾക്ക് 100 കോടിയിലധികം രൂപയുടെ വായ്പ വിതരണം ചെയ്യുമെന്നും അധികൃതർ അറിയിച്ചു. കോർപ്പറേഷന്റെ വാർത്താപത്രികയായ **'ദിശ'**യുടെ പ്രകാശനവും ചടങ്ങിൽ നടക്കും.

'സമഗ്ര 2026'യുടെ തുടർപരിപാടി സെപ്റ്റംബറിൽ പാലക്കാട്ടും, ഗുണഭോക്താക്കളുടെ ഉൽപ്പന്നങ്ങളുടെ പ്രദർശന-വിപണന മേള ഡിസംബറിൽ സംഘടിപ്പിക്കുമെന്നും മന്ത്രി അറിയിച്ചു. കേന്ദ്ര ഏജൻസികളുടെ സഹകരണത്തോടെ രാജ്യത്തിന്റെ വിവിധ ഭാഗങ്ങളിൽ നിന്നുള്ള കരകൗശല വിദഗ്ധരും മേളയിൽ പങ്കെടുക്കും. ഇതിലൂടെ ഗുണഭോക്താക്കൾക്ക് പുതിയ വിപണിസാധ്യതകൾ തുറന്നുകിട്ടുമെന്നാണ് പ്രതീക്ഷ.