ദോഹ: ഖത്തറിലെ സമുദ്രമേഖലയിൽ 'അൽ-ഖിൻ' എന്ന് പ്രാദേശികമായി അറിയപ്പെടുന്ന പാരറ്റ് ഫിഷിന്റെ (Parrotfish) സാന്നിധ്യം കണ്ടെത്തി. ഇത് ഖത്തറിന്റെ സമുദ്ര ആവാസവ്യവസ്ഥയുടെ ആരോഗ്യകരമായ അവസ്ഥയെ സൂചിപ്പിക്കുന്ന ശുഭസൂചനയാണെന്ന് പരിസ്ഥിതി കാലാവസ്ഥാ വ്യതിയാന മന്ത്രാലയം (MoECC) അറിയിച്ചു.മന്ത്രാലയത്തിന് കീഴിലുള്ള വൈൽഡ് ലൈഫ് ഡെവലപ്‌മെന്റ് ഡിപ്പാർട്ട്‌മെന്റാണ് ഈ നിരീക്ഷണം നടത്തിയത്. പാരറ്റ് ഫിഷുകളുടെ സാന്നിധ്യം ഖത്തറിലെ പവിഴപ്പുറ്റുകളുടെ മികച്ച ആരോഗ്യത്തെയാണ് പ്രതിഫലിപ്പിക്കുന്നതെന്ന് മന്ത്രാലയം പ്രസ്താവനയിൽ വ്യക്തമാക്കി.പാരറ്റ് ഫിഷുകൾ പവിഴപ്പുറ്റുകൾക്ക് മുകളിൽ വളരുന്ന പായലുകൾ (Algae) ഭക്ഷണമാക്കുന്നു. പായലുകൾ അമിതമായി വളരുന്നത് പവിഴപ്പുറ്റുകളുടെ നാശത്തിന് കാരണമാകും. അതിനാൽ, ഈ മത്സ്യങ്ങൾ പവിഴപ്പുറ്റുകളെ സംരക്ഷിക്കുന്നതിൽ പ്രധാന പങ്ക് വഹിക്കുന്നു.
സമുദ്രത്തിലെ ജൈവവൈവിധ്യവും ജലത്തിന്റെ ഗുണനിലവാരവും നിലനിർത്തുന്നതിൽ പാരറ്റ് ഫിഷുകളുടെ പങ്ക് നിർണ്ണായകമാണ്.സമുദ്രത്തിലെ ജൈവവൈവിധ്യം സംരക്ഷിക്കുന്നതിനും ആവാസവ്യവസ്ഥയുടെ സുസ്ഥിരത ഉറപ്പാക്കുന്നതിനുമുള്ള നിരീക്ഷണങ്ങളും പ്രവർത്തനങ്ങളും ഊർജിതമായി തുടരുമെന്ന് പരിസ്ഥിതി മന്ത്രാലയം വ്യക്തമാക്കി.
തത്തയുടെ കൊക്കിന് സമാനമായ പല്ലുകൾ ഉള്ളതിനാലാണ് ഇവയ്ക്ക് പാരറ്റ് ഫിഷ് എന്ന് പേര് ലഭിച്ചത്. ഖത്തറിലെ തീരദേശ മേഖലകളിൽ ഇവയെ കാണപ്പെടുന്നത് സമുദ്ര പരിസ്ഥിതി മെച്ചപ്പെടുന്നതിന്റെ അടയാളമായാണ് വിദഗ്ധർ കാണുന്നത്.
