ദോഹ: 2026-ലെ (ഹിജ്റ 1447) ഹജ്ജ് കർമ്മങ്ങളിൽ പങ്കെടുക്കുന്ന തീർത്ഥാടകർ പാലിക്കേണ്ട വാക്സിനേഷൻ നിർദ്ദേശങ്ങൾ ഖത്തർ പൊതുജനാരോഗ്യ മന്ത്രാലയം പ്രഖ്യാപിച്ചു. തീർത്ഥാടകരുടെ ആരോഗ്യം സംരക്ഷിക്കുന്നതിനും പകർച്ചവ്യാധികൾ പടരുന്നത് തടയുന്നതിനുമുള്ള മുൻകരുതൽ നടപടികളുടെ ഭാഗമായാണ് ഈ നിർദ്ദേശങ്ങൾ.എല്ലാ ഹജ്ജ് തീർത്ഥാടകരും നിർബന്ധമായും 'ക്വാഡ്രിവാലന്റ് മെനിംഗോകോക്കൽ' വാക്സിൻ സ്വീകരിച്ചിരിക്കണം.65 വയസ്സിന് മുകളിൽ പ്രായമുള്ളവർ, ഗർഭിണികൾ, വിട്ടുമാറാത്ത രോഗങ്ങളുള്ളവർ (ഹൃദയസംബന്ധമായ അസുഖങ്ങൾ, വൃക്കരോഗങ്ങൾ, ശ്വാസകോശ സംബന്ധമായ പ്രശ്നങ്ങൾ തുടങ്ങിയവ) എന്നിവർക്ക് കോവിഡ് വാക്സിൻ നിർബന്ധമാണ്. 18 വയസ്സിന് മുകളിലുള്ള മറ്റെല്ലാവർക്കും ഈ വാക്സിൻ മന്ത്രാലയം ശുപാർശ ചെയ്യുന്നു.എല്ലാ തീർത്ഥാടകരും സീസണൽ ഇൻഫ്ലുവൻസ വാക്സിൻ എടുക്കുന്നത് ഉചിതമായിരിക്കും.ഖത്തറിലെ എല്ലാ പ്രാഥമിക ആരോഗ്യ കേന്ദ്രങ്ങളിലും (PHCC) ഹജ്ജ് വാക്സിനുകൾ ലഭ്യമാണ്.വിട്ടുമാറാത്ത അസുഖങ്ങളുള്ളവർ യാത്രയ്ക്ക് മുൻപ് ഡോക്ടറെ കണ്ട് മതിയായ പരിശോധനകൾ നടത്തുകയും യാത്രയിലുടനീളം ആവശ്യമുള്ള മരുന്നുകൾ കരുതുകയും വേണം.
തീർത്ഥാടകർക്കായി മന്ത്രാലയം തയ്യാറാക്കിയ പ്രത്യേക ആരോഗ്യ ഗൈഡ് വെബ്സൈറ്റിൽ ലഭ്യമാണ്. നാഷണൽ ഹെൽത്ത് സ്ട്രാറ്റജി 2024-2030-ന്റെ ഭാഗമായി ജനങ്ങളുടെ സുരക്ഷ ഉറപ്പാക്കുന്നതിനാണ് ഇത്തരം പ്രതിരോധ നടപടികൾക്ക് മുൻഗണന നൽകുന്നതെന്ന് അധികൃതർ വ്യക്തമാക്കി.
