ന്യൂഡൽഹി: ലോക ചെസ് വേദിയിൽ വീണ്ടും ഇന്ത്യൻ പതാക ഉയർത്തി ഗ്രാൻഡ്മാസ്റ്റർ ആർ. പ്രഗ്നാനന്ദ. ഇറ്റാലിയൻ-അമേരിക്കൻ ഗ്രാൻഡ്മാസ്റ്റർ ഫാബിയാനോ കരുവാനയെ മറികടന്നാണ് പ്രഗ്നാനന്ദ ഗ്രാൻഡ് ചെസ് ടൂർ കിരീടം സ്വന്തമാക്കിയത്. തുടക്കത്തിൽ പിന്നിലായിരുന്ന താരം റാപ്പിഡിലും ബ്ലിറ്റ്സിലും നടത്തിയ തകർപ്പൻ തിരിച്ചുവരവിലൂടെയാണ് കിരീടത്തിലേക്ക് മുന്നേറിയത്.
ക്ലാസിക്കൽ റൗണ്ടുകൾ പൂർത്തിയാകുമ്പോൾ കരുവാനയ്ക്ക് പിന്നിൽ ആറു പോയിന്റിന്റെ വ്യത്യാസത്തിലായിരുന്നു പ്രഗ്നാനന്ദ. എന്നാൽ നിർണായകമായ റാപ്പിഡ് റൗണ്ടുകളിൽ മികച്ച പ്രകടനം പുറത്തെടുത്ത താരം രണ്ട് മത്സരങ്ങളിലും വിജയം സ്വന്തമാക്കി. ഇതോടെ കരുവാനയെ മറികടന്ന് ലീഡിലെത്താൻ ഇന്ത്യൻ താരത്തിനായി.
തുടർന്നുള്ള ബ്ലിറ്റ്സ് റൗണ്ടിലും സമ്മർദത്തിന് വഴങ്ങാതെ മുന്നേറ്റം തുടർന്ന പ്രഗ്നാനന്ദ ലീഡ് നിലനിർത്തി. ഒടുവിൽ 15-13 എന്ന സ്കോറിനാണ് കരുവാനയെ പരാജയപ്പെടുത്തി കിരീടം ഉറപ്പിച്ചത്.
ഈ വിജയത്തോടെ ഗ്രാൻഡ് ചെസ് ടൂർ കിരീടം നേടുന്ന ആദ്യ ഇന്ത്യൻ താരമെന്ന ചരിത്രനേട്ടവും പ്രഗ്നാനന്ദ സ്വന്തമാക്കി. പിന്നിൽനിന്നുള്ള അതിശക്തമായ തിരിച്ചുവരവാണ് താരത്തിന്റെ കിരീടവിജയത്തിന് വഴിയൊരുക്കിയത്.
