തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധിക്ക് ഉടൻ പരിഹാരമാകില്ലെന്ന് വൈദ്യുതി മന്ത്രി സണ്ണി ജോസഫ്. പകൽ സമയത്ത് ലഭിക്കുന്ന അധിക വൈദ്യുതി കൊണ്ട് നിലവിലെ പ്രതിസന്ധി മറികടക്കാനാകില്ലെന്നും രാത്രി സമയത്തെ ഉയർന്ന വൈദ്യുതി ഉപഭോഗം നേരിടാനുള്ള സംവിധാനമാണ് പ്രധാനമായും ആവശ്യമെന്നും മന്ത്രി വ്യക്തമാക്കി. ഇതോടെ സംസ്ഥാനത്തെ വൈദ്യുതി നിയന്ത്രണം തുടരുമെന്നും അദ്ദേഹം അറിയിച്ചു.

ഹിമാചൽ പ്രദേശ് സർക്കാർ വാഗ്ദാനം ചെയ്ത 250 മെഗാവാട്ട് വൈദ്യുതി പകൽ സമയത്താണ് ലഭിക്കുക. എന്നാൽ കേരളത്തിൽ ഏറ്റവും കൂടുതൽ വൈദ്യുതി ആവശ്യമായി വരുന്നത് വൈകീട്ട് മുതൽ അർധരാത്രി വരെയുള്ള സമയത്താണ്. അതിനാൽ പകൽ ലഭിക്കുന്ന വൈദ്യുതി നിലവിലെ പ്രതിസന്ധിക്ക് കാര്യമായ പരിഹാരമാകില്ലെന്നാണ് കെഎസ്ഇബിയുടെ വിലയിരുത്തൽ.

രാജ്യത്താകെ വൈദ്യുതി ആവശ്യകത ഉയർന്നതോടെ ലഭ്യത കുറഞ്ഞ സാഹചര്യത്തിലാണ് കേരളത്തിലും നിയന്ത്രണം തുടരുന്നത്. നിലവിൽ വൈകീട്ട് 6.15 മുതൽ രാത്രി 12.45 വരെ ലോഡ് ഷെഡ്ഡിങ് ഏർപ്പെടുത്തിയിട്ടുണ്ട്.

പ്രതിസന്ധി മറികടക്കാൻ അടുത്ത മാസം മുതൽ ഡിസംബർ വരെ അധിക വൈദ്യുതി വാങ്ങാനുള്ള നടപടികളും കെഎസ്ഇബി ആരംഭിച്ചു. അടുത്ത മാസം പീക്ക് സമയത്തേക്ക് 600 മെഗാവാട്ട് വൈദ്യുതിക്കാണ് ടെൻഡർ ക്ഷണിച്ചിരിക്കുന്നത്. രാത്രി 12 മുതൽ രാവിലെ വരെയുള്ള സമയത്തേക്ക് 900 മെഗാവാട്ടിനും രാവും പകലുമായി ഉപയോഗിക്കാവുന്ന 300 മെഗാവാട്ടിനും ടെൻഡർ നൽകിയിട്ടുണ്ട്.

ഡിസംബർ വരെയുള്ള മാസങ്ങളിലും സമാനമായ രീതിയിൽ വൈദ്യുതി വാങ്ങാനാണ് നീക്കം. ആവശ്യപ്പെട്ട അളവിന്റെ പകുതിയെങ്കിലും ലഭിച്ചാൽ നിലവിലെ പ്രതിസന്ധി ഒരു പരിധിവരെ നിയന്ത്രിക്കാനാകുമെന്നാണ് കെഎസ്ഇബിയുടെ കണക്കുകൂട്ടൽ.

അടുത്ത മാസം പീക്ക് സമയത്തേക്ക് 588 മെഗാവാട്ട് വൈദ്യുതി വാങ്ങുന്നതിനായി രണ്ട് ഘട്ടങ്ങളിലായി കമ്മീഷൻ അനുമതി നൽകിയിട്ടുണ്ട്. ജൂലൈ വരെ രാവും പകലും ഉപയോഗിക്കാവുന്ന 200 മെഗാവാട്ട് അധിക വൈദ്യുതി വാങ്ങുന്നതിനും അനുമതി ലഭിച്ചിരുന്നു.

അതേസമയം, വേനൽക്കാലത്ത് വാങ്ങിയ വൈദ്യുതിയുടെ ബാധ്യത ഈ മാസത്തോടെ അവസാനിക്കുന്നതിനാൽ 250 മെഗാവാട്ട് അധിക വൈദ്യുതി ഉപയോഗിക്കാൻ കഴിയുമെന്നതും കെഎസ്ഇബിക്ക് ആശ്വാസമാണ്. പ്രതിസന്ധിക്ക് സ്ഥിരപരിഹാരം കണ്ടെത്തുന്നതിനുള്ള നടപടികൾ തുടരുകയാണെന്നും മന്ത്രി വ്യക്തമാക്കി.