ഹൈദരാബാദ്: തെലങ്കാനയിൽ 18കാരിയായ നഴ്സിംഗ് വിദ്യാർഥിനിയെ വീടിന് സമീപം ദുരൂഹസാഹചര്യത്തിൽ മരിച്ചനിലയിൽ കണ്ടെത്തിയ സംഭവം കൊലപാതകമെന്ന് പൊലീസ്. ഖമ്മത്തെ സ്വകാര്യ കോളജിൽ ഒന്നാം വർഷ നഴ്സിംഗ് വിദ്യാർഥിനിയായ വെങ്കണ്ണപാലം സ്വദേശിനി ഹരിണിയെയാണ് മരിച്ചനിലയിൽ കണ്ടെത്തിയത്.
അവധി ലഭിച്ചതിനെ തുടർന്ന് ഏതാനും ദിവസം മുൻപാണ് ഹരിണി വീട്ടിലെത്തിയത്. അമ്മ രാജേശ്വരിയും സഹോദരിയും ഹരിണിയുമായിരുന്നു വീട്ടിൽ താമസിച്ചിരുന്നത്. ഹരിണിയുടെ പിതാവ് നേരത്തെ മരിച്ചിരുന്നു. കൂലിപ്പണിക്കാരിയായ രാജേശ്വരി കഴിഞ്ഞ ദിവസം ജോലി കഴിഞ്ഞ് വീട്ടിലെത്തിയപ്പോൾ മകളെ വീട്ടിൽ കണ്ടെത്താനായില്ല.
തുടർന്ന് നടത്തിയ തിരച്ചിലിലാണ് വീടിന് പുറത്തുള്ള കുളിമുറിക്ക് സമീപം ഹരിണിയെ മരിച്ചനിലയിൽ കണ്ടെത്തിയത്. ആദ്യം അസ്വാഭാവിക മരണത്തിനാണ് പൊലീസ് കേസെടുത്തത്. എന്നാൽ മകളുടെ മരണം കൊലപാതകമാണെന്ന് ആരോപിച്ച് അമ്മ രാജേശ്വരി രംഗത്തെത്തി. അയൽവാസികളായ ചിലർക്കെതിരെ സംശയം ഉന്നയിച്ച് പൊലീസിന് മൊഴിയും നൽകി.
തുടർന്നുള്ള അന്വേഷണത്തിന്റെ ഭാഗമായി നടത്തിയ പോസ്റ്റുമോർട്ടത്തിലാണ് നിർണായക വിവരം പുറത്തുവന്നത്. ശ്വാസംമുട്ടിയാണ് ഹരിണി മരിച്ചതെന്നാണ് പോസ്റ്റുമോർട്ടം റിപ്പോർട്ടിലെ കണ്ടെത്തൽ. ഇതോടെയാണ് പൊലീസ് കൊലപാതകത്തിന് കേസ് രജിസ്റ്റർ ചെയ്തത്.
സംഭവത്തിൽ പ്രതികളെന്ന് സംശയിക്കുന്നവരെ കണ്ടെത്താനുള്ള അന്വേഷണം പൊലീസ് ശക്തമാക്കി. പ്രദേശവാസികളിൽനിന്ന് വിവരങ്ങൾ ശേഖരിക്കുന്നതിനൊപ്പം സംഭവവുമായി ബന്ധപ്പെട്ട സാഹചര്യങ്ങളും പൊലീസ് പരിശോധിച്ചുവരികയാണ്.
