തിരുവനന്തപുരം: പ്ലാനിങ് ബോർഡ് ചീഫ് തസ്തികയിലെ നിയമനവുമായി ബന്ധപ്പെട്ട ക്രമക്കേട് അന്വേഷണത്തിൽ ഉണ്ടായ വിവാദങ്ങൾക്ക് പിന്നാലെ അന്വേഷണം ആഭ്യന്തര വിജിലൻസ് എസ്‌പിക്ക് കൈമാറാൻ പി.എസ്.സി തീരുമാനിച്ചു. ഇന്നു ചേർന്ന കമ്മിഷൻ യോഗത്തിലാണ് ഈ തീരുമാനം.

നേരത്തെ, അന്വേഷണം ആഭ്യന്തര വിജിലൻസ് വിഭാഗത്തെ ഏൽപ്പിക്കാൻ കമ്മിഷൻ തീരുമാനിച്ചിരുന്നെങ്കിലും പിന്നീട് പി.എസ്.സി ചെയർമാൻ അത് മാറ്റി പരീക്ഷാ കൺട്രോളറെ അന്വേഷണ ചുമതല ഏൽപ്പിച്ചതാണ് വിമർശനങ്ങൾക്ക് ഇടയാക്കിയത്. ഇതിനെതിരെ കമ്മിഷൻ യോഗത്തിൽ ചില അംഗങ്ങൾ ശക്തമായ എതിർപ്പ് രേഖപ്പെടുത്തിയതോടെയാണ് പരീക്ഷാ കൺട്രോളറുടെ അന്വേഷണം റദ്ദാക്കി വീണ്ടും ആഭ്യന്തര വിജിലൻസിന് ചുമതല നൽകാൻ തീരുമാനമായത്.

പ്ലാനിങ് ബോർഡ് ചീഫ് പരീക്ഷയുടെ മൂല്യനിർണയത്തിൽ ഉണ്ടായതായി ആരോപിക്കപ്പെടുന്ന ക്രമക്കേടുകളാണ് വിജിലൻസ് എസ്.പി അന്വേഷിക്കുക. അതേസമയം, പി.എസ്.സിക്കെതിരെ ഉയർന്നിട്ടുള്ള മറ്റ് പരാതികളിൽ വിജിലൻസ് അന്വേഷണം വേണമോ എന്ന കാര്യത്തിൽ സർക്കാർ പിന്നീട് തീരുമാനമെടുക്കും.

പ്ലാനിങ് ബോർഡ് ചീഫ് തസ്തികയിലേക്കുള്ള പരീക്ഷയിലാണ് ഗുരുതരമായ മൂല്യനിർണയ വീഴ്ച പുറത്തുവന്നത്. ആകെ 28 ചോദ്യങ്ങളുള്ള പരീക്ഷയിൽ 18 ചോദ്യങ്ങൾക്ക് മാത്രമാണ് മാർക്ക് നൽകിയതെന്നാണ് കണ്ടെത്തൽ. ശേഷിച്ച 10 ചോദ്യങ്ങൾ, ആകെ 53 മാർക്കിനുള്ളവ, മൂല്യനിർണയത്തിനായി അധ്യാപകർക്ക് കൈമാറാതെയാണ് റാങ്ക് പട്ടിക പ്രസിദ്ധീകരിക്കുകയും നിയമനം നടത്തുകയും ചെയ്തതെന്നാണ് ആരോപണം.

ഉദ്യോഗാർഥികൾ ഉത്തരക്കടലാസുകളുടെ പകർപ്പ് ലഭ്യമാക്കിയതോടെയാണ് ക്രമക്കേട് പുറത്തറിഞ്ഞത്. മുഴുവൻ ഉത്തരങ്ങളും പരിശോധിക്കാതെയാണ് ഉയർന്ന തസ്തികയിലേക്കുള്ള നിയമന നടപടികൾ പൂർത്തിയാക്കിയതെന്നും തുടർന്ന് അതുസംബന്ധിച്ച അന്വേഷണം ദുർബലപ്പെടുത്താൻ ശ്രമമുണ്ടായെന്നുമാണ് ഉയരുന്ന ആരോപണം.