കൊച്ചി: പോപ്പുലർ ഫ്രണ്ട് ഓഫ് ഇന്ത്യ (പിഎഫ്‌ഐ) തീവ്രവാദക്കേസിൽ ദേശീയ അന്വേഷണ ഏജൻസി ഒരു പ്രധാന പ്രതിയെ അറസ്റ്റ് ചെയ്തു. വിദേശത്ത് ഒളിവിൽ കഴിഞ്ഞിരുന്ന മലപ്പുറം വളാഞ്ചേരി സ്വദേശി മൊയ്തീൻകുട്ടിയാണ് അറസ്റ്റിലായത്. വിദേശത്തായിരുന്ന ഇയാൾ രാജ്യത്ത് തിരിച്ചെത്തിയതോടെ നെടുമ്പാശ്ശേരി വിമാനത്താവളത്തിൽ നിന്നാണ് എൻഐഎ കസ്റ്റഡിയിലെടുത്തത്. പിഎഫ്‌ഐ തീവ്രവാദക്കേസിലെ 70-ാം പ്രതിയാണ് ഇയാൾ.
പിഎഫ്‌ഐയുടെ ആയുധപരിശീലന വിഭാഗത്തിന്റെ കോ-ഓർഡിനേറ്ററായിരുന്നു മൊയ്തീൻകുട്ടിയെന്ന് എൻഐഎ വ്യക്തമാക്കി. സംഘടനയ്‌ക്കെതിരെ രാജ്യവ്യാപകമായി റെയ്ഡ് നടത്തിയതിനു പിന്നാലെ പോപ്പുലർ ഫ്രണ്ട് ഓഫ് ഇന്ത്യ നിരോധിക്കപ്പെട്ടിരുന്നു. ഈ നടപടികൾക്ക് ശേഷമാണ് മൊയ്തീൻകുട്ടി രാജ്യം വിട്ടത്.
വിദേശത്തേക്ക് കടന്നതോടെ ഇയാളെ എൻഐഎ പിടികിട്ടാപ്പുള്ളിയായി പ്രഖ്യാപിക്കുകയും, വിവരങ്ങൾ നൽകുന്നവർക്ക് പാരിതോഷികം പ്രഖ്യാപിക്കുകയും ചെയ്തിരുന്നു. ഇതിനിടയിലാണ് മൊയ്തീൻകുട്ടി നാട്ടിലെത്തിയത്. നെടുമ്പാശ്ശേരിയിൽ വിമാനമിറങ്ങിയ ഉടൻ എൻഐഎ സംഘം ഇയാളെ പിടികൂടുകയായിരുന്നു.
അറസ്റ്റിലായ മൊയ്തീൻകുട്ടി മുൻപ് കൈവെട്ട് കേസിലും പ്രതിയാണെന്ന വിവരവും എൻഐഎ പുറത്തുവിട്ടിട്ടുണ്ട്. ഇയാളെ വിശദമായി ചോദ്യം ചെയ്യുന്നതിനുള്ള നടപടികളിലേക്ക് എൻഐഎ സംഘം കടന്നിരിക്കുകയാണ്.
