ദോഹ: ഖത്തർ സന്ദർശനത്തിനെത്തിയ യൂറോപ്യൻ കൗൺസിൽ പ്രസിഡന്റ് അന്റോണിയോ കോസ്റ്റയുമായി പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽ താനി കൂടിക്കാഴ്ച നടത്തി. മേഖലയിലെ സംഘർഷങ്ങൾ ലഘൂകരിക്കുന്നതിനും സമാധാനം പുനഃസ്ഥാപിക്കുന്നതിനുമുള്ള നയതന്ത്ര നീക്കങ്ങളായിരുന്നു ചർച്ചയിലെ പ്രധാന വിഷയം.അമേരിക്കയും ഇറാനും തമ്മിലുള്ള വെടിനിർത്തൽ സംബന്ധിച്ച ഏറ്റവും പുതിയ സംഭവവികാസങ്ങൾ ഇരുനേതാക്കളും വിലയിരുത്തി. മേഖലയുടെ സുരക്ഷിതത്വവും സ്ഥിരതയും വർധിപ്പിക്കുന്നതിന് സംഘർഷങ്ങൾ ലഘൂകരിക്കേണ്ടതിന്റെ ആവശ്യകത അവർ ഊന്നിപ്പറഞ്ഞു.ഊർജം, വ്യാപാരം, നിക്ഷേപം എന്നീ മേഖലകളിൽ ഖത്തറും യൂറോപ്യൻ യൂണിയനും തമ്മിലുള്ള സഹകരണം ശക്തമാക്കാൻ ധാരണയായി. ആഗോള വിപണിയിലേക്ക് ദ്രാവക പ്രകൃതിവാതകം (LNG) എത്തിക്കുന്നതിൽ ഖത്തർ വഹിക്കുന്ന സുപ്രധാന പങ്കിനെ ചർച്ചയിൽ പരാമർശിച്ചു.
മേഖലയിലെ നിലവിലെ സാഹചര്യങ്ങളിൽ ഖത്തറിനോടുള്ള ഐക്യദാർഢ്യം അന്റോണിയോ കോസ്റ്റ പ്രകടിപ്പിച്ചു. ആഗോള സാമ്പത്തിക സ്ഥിരത നിലനിർത്തുന്നതിനും സാമ്പത്തിക താൽപ്പര്യങ്ങൾ സംരക്ഷിക്കുന്നതിനും ഖത്തറുമായുള്ള ബന്ധം മെച്ചപ്പെടുത്താൻ യൂറോപ്യൻ യൂണിയൻ താൽപ്പര്യം പ്രകടിപ്പിച്ചു.
ആഗോള ഊർജ സുരക്ഷ ഉറപ്പാക്കുന്നതിൽ ഖത്തർ നൽകുന്ന പിന്തുണയെ യൂറോപ്യൻ കൗൺസിൽ പ്രസിഡന്റ് പ്രത്യേകം അഭിനന്ദിച്ചു.
