ദോഹ: വീടുകളുടെയും കെട്ടിടങ്ങളുടെയും ഗേറ്റുകൾക്കും കവാടങ്ങൾക്കും മുന്നിൽ വാഹനങ്ങൾ തടസ്സമായി പാർക്ക് ചെയ്യുന്നത് ശിക്ഷാർഹമായ കുറ്റമാണെന്ന് ഖത്തർ ആഭ്യന്തര മന്ത്രാലയം മുന്നറിയിപ്പ് നൽകി. മറ്റുള്ളവരുടെ അവകാശങ്ങൾ ലംഘിക്കുകയും വാഹന ഗതാഗതം തടസ്സപ്പെടുത്തുകയും ചെയ്യുന്നത് ഒഴിവാക്കണമെന്നും നിയമലംഘകർക്കെതിരെ കർശന നടപടി സ്വീകരിക്കുമെന്നും മന്ത്രാലയം വ്യക്തമാക്കി.
ഔദ്യോഗിക എക്സ് (X) പ്ലാറ്റ്‌ഫോമിലൂടെ പങ്കുവെച്ച ബോധവൽക്കരണ വീഡിയോയിലൂടെയാണ് മന്ത്രാലയം ഇക്കാര്യം വ്യക്തമാക്കിയത്. കെട്ടിടങ്ങളുടെയും വീടുകളുടെയും പ്രവേശന, നിർഗ്ഗമന പാതകൾ അടച്ചുകൊണ്ട് വാഹനം പാർക്ക് ചെയ്യുന്നത് മറ്റുള്ളവർക്ക് ബുദ്ധിമുട്ടുണ്ടാക്കുന്ന തെറ്റായ പെരുമാറ്റവും നിയമലംഘനവുമാണെന്ന് മന്ത്രാലയം ചൂണ്ടിക്കാട്ടി.
ഖത്തർ ട്രാഫിക് നിയമത്തിലെ ആർട്ടിക്കിൾ (78) - ക്ലോസ് (4) പ്രകാരം വീട്ടുപടിക്കൽ തടസ്സമുണ്ടാക്കുന്ന രീതിയിൽ വാഹനം പാർക്ക് ചെയ്യുന്നത് വ്യക്തമായ നിയമലംഘനമാണ്. ഇത്തരം നിയമലംഘനങ്ങൾക്ക് 300 ഖത്തറി റിയാൽ പിഴ ചുമത്തുന്നതോടൊപ്പം ഡ്രൈവറുടെ റെക്കോർഡിൽ 3 ട്രാഫിക് പോയിന്റുകൾ രേഖപ്പെടുത്തുകയും ചെയ്യും.
മറ്റുള്ളവരുടെ സൗകര്യങ്ങളും അവകാശങ്ങളും സംരക്ഷിക്കുന്നതിനായി ഡ്രൈവർമാർ കൃത്യമായ സ്ഥലങ്ങളിൽ മാത്രം വാഹനം പാർക്ക് ചെയ്യാൻ ശ്രദ്ധിക്കണമെന്ന് മന്ത്രാലയം അഭ്യർത്ഥിച്ചു.
