മുംബൈ: പാർവതിയെന്ന് പറഞ്ഞു വിശ്വസിപ്പിച്ച് തന്നെ ബലാത്സംഗം ചെയ്തെന്ന യുവതിയുടെ പരാതിയിൽ ആൾദൈവം അറസ്റ്റിൽ. മഹാരാഷ്ട്രയിലെ പാൽഘറിലാണ് സംഭവം. ഋഷികേശ് വൈദ്യ(40) എന്നയാളെയാണ് പൊലീസ് അറസ്റ്റ് ചെയ്തത്. പുണെ സ്വദേശിനിയായ 35-കാരിയുടെ പരാതിയിലാണ് പൊലീസിന്റെ നടപടി.
ഭഗവാൻ ശിവന്റെ അവതാരമെന്ന് അവകാശപ്പെട്ടാണ് ഋഷികേശ് വൈദ്യ യുവതിയെ സ്വാധീനിച്ചത്. 2023-ൽ ഫെയ്സ്ബുക്ക് വഴിയാണ് യുവതിയും പ്രതിയും പരിചയപ്പെടുന്നത്. 2023 ഡിസംബറിൽ പ്രതി പുണെയിലെത്തി യുവതിയെ കണ്ടു. തുടർന്ന് താൻ ഭഗവാൻ ശിവന്റെ അവതാരമാണെന്നും യുവതി തന്റെ പാർവതിയാണെന്നും വിശ്വസിപ്പിച്ച് പീഡിപ്പിക്കുകയായിരുന്നു. പീഡനദൃശ്യങ്ങൾ പ്രതി മൊബൈൽഫോണിൽ പകർത്തിയതായും പിന്നീട് ഈ ദൃശ്യങ്ങൾ ഉപയോഗിച്ച് ഭീഷണിപ്പെടുത്തിയതായും പരാതിയിലുണ്ട്. കഴിഞ്ഞ മേയ് മാസത്തിൽ ഒരു ഹോട്ടലിലേക്ക് വിളിച്ചുവരുത്തി വീണ്ടും പീഡിപ്പിച്ചതായും പരാതിയിൽ പറയുന്നു.
