പാലക്കാട്: നാലുവയസ്സുകാരനെ കിണറ്റിലെറിഞ്ഞ് കൊലപ്പെടുത്താൻ ശ്രമിച്ച യുവതി അറസ്റ്റിൽ. പാമ്പാമ്പള്ളം സ്വദേശി ശ്വേത(22)യാണ് സ്വന്തം കുഞ്ഞിനെ കിണറ്റിലെറിഞ്ഞ് കൊലപ്പെടുത്താൻ ശ്രമിച്ചത്. കുഞ്ഞ് അദ്ഭുതകരമായി രക്ഷപ്പെട്ടു. യുവതിക്കെതിരെ വധശ്രമത്തിന് വാളയാർ പൊലീസ് കേസെടുത്തു. അമ്മയാണ് കിണറ്റിലേക്ക് തള്ളിയിട്ടതെന്ന് കുഞ്ഞ് പറഞ്ഞതോടെയാണ് യുവതിയെ പൊലീസ് അറസ്റ്റ് ചെയ്തത്.
25 അടി താഴ്ചയുള്ള കിണറ്റിലേക്കാണ് യുവതി കുഞ്ഞിനെ എറിഞ്ഞത്. ഈ സമയം കിണറ്റിൽ പത്തടിയോളം വെള്ളമുണ്ടായിരുന്നു. കിണറ്റിൽനിന്ന് കുഞ്ഞിന്റെ ശബ്ദം കേട്ട് വീടിനോട് ചേർന്ന് മറ്റൊരു വീടിന്റെ നിർമാണജോലികൾ ചെയ്യുകയായിരുന്ന നാലുപേർ ഓടിയെത്തിയാണ് കുഞ്ഞിനെ രക്ഷപ്പെടുത്തിയത്. ഇവർ എത്തുമ്പോൾ ശരീരത്തിന്റെ പകുതിയോളം വെള്ളത്തിലായി കിണറിലുണ്ടായിരുന്ന മോട്ടോറിന്റെ പൈപ്പിൽ പിടിച്ചുനിൽക്കുന്ന വിധത്തിലാണ് കുട്ടിയുണ്ടായിരുന്നത്.
മംഗലത്താൻചള്ളയിലെ വാടകവീട്ടിലാണ് ശ്വേതയും അമ്മയും കുഞ്ഞും താമസിക്കുന്നത്. തമിഴ്‌നാട് സ്വദേശിയാണ് ശ്വേത. ഒരു മാസം മുമ്പാണ് ഇവിടെ താമസമാക്കിയത്. ഭർത്താവുമായി പിണങ്ങി താമസിക്കുകയാണ് വിവരം.
