02:12am 21 November 2026
NEWS
ലോകത്ത് ഏറ്റവും കൂടുതൽ മുസ്ലീങ്ങളുള്ള രാജ്യമായി പാകിസ്ഥാൻ മാറും; ഇന്ത്യ രണ്ടാം സ്ഥാനത്തെത്തും
20/11/2026  08:56 PM IST
nila
ലോകത്ത് ഏറ്റവും കൂടുതൽ മുസ്ലീങ്ങളുള്ള രാജ്യമായി പാകിസ്ഥാൻ മാറും; ഇന്ത്യ രണ്ടാം സ്ഥാനത്തെത്തും

ലോകജനസംഖ്യയിൽ മുസ്‌ലിങ്ങളുടെ എണ്ണം ക്രിസ്ത്യാനികളുടേതിനെ മറികടക്കുമെന്ന് പ്രവചിച്ച് പ്യൂ റിസർച്ച് സെന്ററിന്റെ പഠന റിപ്പോർട്ട് കഴിഞ്ഞ ദിവസം പുറത്തുവന്നിരുന്നു. 2035ഓടെ ലോകത്ത് ഏറ്റവും കൂടുതൽ അനുയായികളുള്ള മതവിഭാഗമായി മുസ്‌ലിങ്ങൾ മാറുമെന്നാണ് പുതിയ റിപ്പോർട്ട് വ്യക്തമാക്കുന്നത്. 2020 മുതൽ 2070 വരെയുള്ള കാലയളവിൽ ലോകത്തെ മുസ്‌ലിം ജനസംഖ്യയിൽ 80 ശതമാനം വർധനയുണ്ടാകുമെന്നാണ് പ്രവചനം. 2020ൽ 202 കോടി ആയിരുന്ന മുസ്‌ലിം ജനസംഖ്യ 2070ൽ 364 കോടിയായി ഉയരും. ഇതേ കാലയളവിൽ ക്രിസ്ത്യൻ ജനസംഖ്യ 30 ശതമാനം വർധിച്ച് 296 കോടിയിലെത്തുമെന്നാണ് കണക്കുകൂട്ടൽ. ലോകജനസംഖ്യയുടെ മൊത്തത്തിലുള്ള വളർച്ചയ്ക്ക് ഏകദേശം സമാനമായിരിക്കും ക്രിസ്ത്യൻ ജനസംഖ്യയുടെ വർധന.

ഏറ്റവും വേഗത്തിൽ വളരുന്ന മതവിഭാഗം മുസ്‌ലിംകൾ

പ്രധാന മതവിഭാഗങ്ങളിൽ ഏറ്റവും വേഗത്തിൽ വളരുന്നത് മുസ്‌ലിം ജനസംഖ്യയായിരിക്കുമെന്നാണ് പ്യൂ റിസർച്ച് സെന്ററിന്റെ വിലയിരുത്തൽ. ഹിന്ദുക്കളുടെയും ജൂതരുടെയും ജനസംഖ്യാ വളർച്ച ലോകജനസംഖ്യയുടെ ശരാശരി വളർച്ചാനിരക്കിനേക്കാൾ താഴെയായിരിക്കും. 

ജനനനിരക്കിലെ വ്യത്യാസമാണ് ഈ മാറ്റത്തിന് പ്രധാന കാരണം. 2020 മുതൽ 2025 വരെയുള്ള കാലയളവിൽ മുസ്‌ലിം സ്ത്രീകൾക്ക് ശരാശരി 3.1 കുട്ടികളുണ്ടായപ്പോൾ ക്രിസ്ത്യൻ സ്ത്രീകളിൽ ഇത് 2.5 ആയിരുന്നു. മറ്റ് മതവിഭാഗങ്ങളിൽപ്പെട്ട സ്ത്രീകളുടെ ശരാശരി ജനനനിരക്ക് 1.6 മാത്രമാണ്. ഒരു ജനസംഖ്യ നിലനിൽക്കാൻ ഒരു സ്ത്രീക്ക് ശരാശരി 2.1 കുട്ടികളെങ്കിലും വേണമെന്നാണ് കണക്കാക്കുന്നത്.

ജനനങ്ങളും മരണങ്ങളും തമ്മിലുള്ള വ്യത്യാസം മൂലം 2070ഓടെ മുസ്‌ലിം ജനസംഖ്യയിൽ 160 കോടി പേരുടെ വർധനയുണ്ടാകുമെന്നാണ് പ്രവചനം. ക്രിസ്ത്യൻ ജനസംഖ്യയിൽ ഇതേ കാരണത്താൽ 79.2 കോടിയുടെ വർധനയുണ്ടാകും.

ഏറ്റവും കൂടുതൽ മുസ്‌ലിങ്ങളുള്ള രാജ്യമായി പാക്കിസ്ഥാൻ

നിലവിൽ മുസ്‌ലിം ഭൂരിപക്ഷമുള്ള രാജ്യങ്ങളിലായിരിക്കും ജനസംഖ്യാ വർധനയുടെ വലിയൊരു പങ്കും സംഭവിക്കുക. ലോകത്തെ 53 മുസ്‌ലിം ഭൂരിപക്ഷ രാജ്യങ്ങളിലായി 2070ഓടെ 120 കോടി മുസ്‌ലിങ്ങൾ കൂടി ഉണ്ടാകുമെന്നാണ് കണക്ക്. ആഗോള മുസ്‌ലിം ജനസംഖ്യയിലെ മൊത്തം വർധനയുടെ 74 ശതമാനവും ഈ രാജ്യങ്ങളിലായിരിക്കും.

2020ലെ കണക്കനുസരിച്ച് 23.9 കോടി മുസ്‌ലിങ്ങളുമായി ഇന്തൊനീഷ്യയായിരുന്നു ലോകത്ത് ഏറ്റവും കൂടുതൽ മുസ്‌ലിം ജനസംഖ്യയുള്ള രാജ്യം. തൊട്ടുപിന്നിൽ 22.7 കോടിയുമായി പാക്കിസ്ഥാനുമുണ്ടായിരുന്നു. എന്നാൽ 2070ഓടെ പാക്കിസ്ഥാൻ ഒന്നാം സ്ഥാനത്തെത്തുമെന്നാണ് പ്രവചനം. പാക്കിസ്ഥാനിലെ മുസ്‌ലിം ജനസംഖ്യ ഇരട്ടിയായി 46.1 കോടിയിലെത്തുമ്പോൾ ഇന്തൊനീഷ്യയിൽ 15 ശതമാനം മാത്രമായിരിക്കും വർധന. അതിനാൽ 2070ന് ഏറെ മുമ്പുതന്നെ പാക്കിസ്ഥാൻ ഒന്നാം സ്ഥാനത്തെത്താൻ സാധ്യതയുണ്ടെന്നും കണക്കുകൾ സൂചിപ്പിക്കുന്നു.

ഇന്ത്യയുടെ മുസ്‌ലിം ജനസംഖ്യ നിലവിലെ മൂന്നാം സ്ഥാനത്തുനിന്ന് രണ്ടാം സ്ഥാനത്തേക്ക് ഉയരുമെന്നാണ് പ്രവചനം. 2020ൽ 21.3 കോടിയായിരുന്ന മുസ്‌ലിം ജനസംഖ്യ 2070ഓടെ 33.4 കോടിയിലെത്തും. നൈജീരിയ അഞ്ചാം സ്ഥാനത്തുനിന്ന് മൂന്നാം സ്ഥാനത്തേക്ക് കുതിക്കും. രാജ്യത്തെ മുസ്‌ലിം ജനസംഖ്യ ഇരട്ടിയിലധികമായി 28.2 കോടിയിലെത്തുമെന്നാണ് കണക്ക്. ഇതോടെ ഇന്തൊനീഷ്യ നാലാം സ്ഥാനത്തേക്ക് മാറും.

2070ലെ ഏറ്റവും കൂടുതൽ മുസ്‌ലിം ജനസംഖ്യയുള്ള പത്ത് രാജ്യങ്ങളിൽ നാലും ആഫ്രിക്കയിലായിരിക്കും. നൈജീരിയ, ഈജിപ്ത്, എത്യോപ്യ, സുഡാൻ എന്നിവയാണ് ഈ രാജ്യങ്ങൾ. നിലവിലെ പട്ടികയിൽനിന്ന് ഇറാനും അൾജീരിയയും പുറത്താകുമ്പോൾ എത്യോപ്യയും അഫ്ഗാനിസ്ഥാനും ആദ്യ പത്തിലേക്ക് കടക്കും. സുഡാനിലെ മുസ്‌ലിം ജനസംഖ്യ ഇരട്ടിയിലധികമായി 11.6 കോടിയിലെത്തുകയും തുർക്കിയെ മറികടക്കുകയും ചെയ്യും.

ലോകജനസംഖ്യയുടെ 99.98 ശതമാനത്തെയും ഉൾക്കൊള്ളുന്ന 201 രാജ്യങ്ങളിലെയും പ്രദേശങ്ങളിലെയും വിവരങ്ങൾ അടിസ്ഥാനമാക്കിയാണ് പ്യൂ റിസർച്ച് സെന്റർ പ്രവചനങ്ങൾ തയ്യാറാക്കിയിരിക്കുന്നത്. നിലവിലുള്ള ജനനനിരക്ക്, മരണനിരക്ക്, മതംമാറ്റ പ്രവണതകൾ എന്നിവ തുടരുമെന്ന അനുമാനത്തിലാണ് കണക്കുകൾ. എന്നാൽ യുദ്ധങ്ങൾ, പ്രകൃതിദുരന്തങ്ങൾ, സാമ്പത്തിക സാഹചര്യങ്ങളിലെ മാറ്റങ്ങൾ തുടങ്ങിയ ഘടകങ്ങൾ ഭാവിയിലെ ജനസംഖ്യാ കണക്കുകളിൽ വ്യത്യാസമുണ്ടാക്കാമെന്നും പഠനം ചൂണ്ടിക്കാട്ടുന്നു.

ഇവിടെ പോസ്റ്റുചെയ്യുന്ന അഭിപ്രായങ്ങള്‍ കേരളശബ്‌ദത്തിന്റേതല്ല . അഭിപ്രായങ്ങളുടെ പൂര്‍ണ്ണ ഉത്തരവാദിത്വം രചയിതാവിനായിരിക്കും. കേന്ദ്ര സർക്കാരിന്റെ ഐ.ടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളൂം നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
WORLD
img