കുസാറ്റ് വൈസ് ചാൻസലർ ഡോ. എം ജുനൈദ് ബുഷിരി പി.ആർ. പിഷാരടി സ്മാരക പ്രഭാഷണത്തിന്റെ ഉദ്ഘാടന ചടങ്ങിൽ സംസാരിക്കുന്നു.
കൊച്ചി: 38-ാം കേരള ശാസ്ത്ര കോൺഗ്രസിന് മുന്നോടിയായി സംഘടിപ്പിച്ച പി.ആർ. പിഷാരടി സ്മാരക പ്രഭാഷണം കൊച്ചി ശാസ്ത്ര സാങ്കേതിക സർവകലാശാലയിൽ (കുസാറ്റ്) വൈസ് ചാൻസലർ ഡോ. എം. ജുനൈദ് ബുഷിരി സർവകലാശാല സെമിനാർ കോംപ്ലക്സിൽ ഉദ്ഘാടനം ചെയ്തു. വിക്രം സാരാഭായി സ്പേസ് സെന്റർ (VSSC) ഡയറക്ടർ എ. രാജരാജൻ സ്മാരക പ്രഭാഷണം നടത്തി. ഇന്ത്യയിലെ റിമോട്ട് സെൻസിങ്ങിന്റെ പിതാവായി വിശേഷിപ്പിക്കപ്പെടുന്ന പ്രൊഫ. പി.ആർ. പിഷാരടിയുടെ (1909–2002) സ്മരണാർത്ഥമാണ് പ്രഭാഷണം സംഘടിപ്പിച്ചത്. പ്രശസ്ത കാലാവസ്ഥ ശാസ്ത്രജ്ഞനും ഭൗതിക ശാസ്ത്രജ്ഞനുമായിരുന്ന അദ്ദേഹം രാജ്യത്തെ മൺസൂൺ, കാലാവസ്ഥാ ഗവേഷണ രംഗങ്ങളിൽ നിർണായക സംഭാവനകൾ നൽകിയ വ്യക്തിയാണ്. ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മീറ്റിയോറോളജിയുടെ സ്ഥാപക ഡയറക്ടർ കൂടിയായിരുന്ന പ്രൊഫ. പിഷാരടിയുടെ ഉപഗ്രഹ കാലാവസ്ഥാ ശാസ്ത്രത്തിലും റിമോട്ട് സെൻസിങ്ങിലുമുള്ള സംഭാവനകൾ ഇന്ത്യയുടെ ശാസ്ത്രീയ രംഗത്ത് ദീർഘകാല സ്വാധീനം ചെലുത്തിയിട്ടുണ്ട്. കേരള സ്റ്റേറ്റ് കൗൺസിൽ ഫോർ സയൻസ്, ടെക്‌നോളജി ആൻഡ് എൻവയോൺമെന്റ് (KSCSTE) കുസാറ്റുമായി സഹകരിച്ചാണ് പരിപാടി സംഘടിപ്പിച്ചത്. ജനുവരി 30 മുതൽ ഫെബ്രുവരി 2 വരെ എറണാകുളത്തെ സെന്റ് ആൽബർട്ട്‌സ് കോളേജ് (ഓട്ടോണമസ്) വേദിയാകുന്ന 38-ാം കേരള ശാസ്ത്ര കോൺഗ്രസിന്റെ ഭാഗമായാണ് ഈ സ്മാരക പ്രഭാഷണം നടന്നത്.
Photo Courtesy - Google
