ദോഹ:ഫിഫ അറബ് കപ്പ് ഖത്തർ 2025നും ഫിഫ ഇന്റർകോണ്ടിനെന്റൽ കപ്പ് ഖത്തർ 2025നും ഇടയിൽ (ഡിസംബർ 1 മുതൽ 18 വരെ) ദോഹ മെട്രോയും ലുസൈൽ ട്രാം നെറ്റ്‌വർക്കും ഉപയോഗിച്ച യാത്രക്കാരുടെ എണ്ണം 49,24,919 ആയി എത്തിയതായി ഖത്തർ റെയിൽ അറിയിച്ചു. ഇതിൽ 47,12,758 പേർ മെട്രോയും 2,12,161 പേർ ട്രാമും ഉപയോഗിച്ചു. ദിവസേന ശരാശരി 2,73,606 യാത്രക്കാർ നെറ്റ്‌വർക്കുകൾ ആശ്രയിച്ചു.ടൂർണമെന്റുകളുടെ സ്റ്റേഡിയങ്ങളിലേക്കും ഇവന്റ് സോണുകളിലേക്കും രാജ്യത്തെ പ്രധാന കേന്ദ്രങ്ങളിലേക്കും ആരാധകരുടെയും സന്ദർശകരുടെയും ഗതാഗതം സുഗമമാക്കുന്നതിൽ മെട്രോ–ട്രാം നിർണായക പങ്ക് വഹിച്ചു. സുരക്ഷിതവും വിശ്വാസ്യതയുള്ളതുമായ ആഗോള നിലവാരത്തിലുള്ള സേവനങ്ങളാണ് ഈ കാലയളവിൽ ഒരുക്കിയതെന്ന് ഖത്തർ റെയിൽ വ്യക്തമാക്കി.
അറബ് കപ്പ് മത്സരങ്ങൾ ലുസൈൽ, അഹമ്മദ് ബിൻ അലി, അൽ ബൈത്ത്, എഡ്യൂക്കേഷൻ സിറ്റി, ഖലീഫ ഇന്റർനാഷണൽ, സ്റ്റേഡിയം 974 എന്നീ ആറ് സ്റ്റേഡിയങ്ങളിലായി നടന്നു. ഇതിൽ അഞ്ച് സ്റ്റേഡിയങ്ങൾ മെട്രോ സ്റ്റേഷനുകളിൽ നിന്ന് നടന്ന് എത്താവുന്ന ദൂരത്തിലായിരുന്നു. അൽ ബൈത്ത് സ്റ്റേഡിയത്തിലേക്കുള്ള യാത്ര ലുസൈൽ QNB മെട്രോ സ്റ്റേഷനിൽ നിന്ന് പ്രത്യേക ഷട്ടിൽ ബസുകൾ വഴിയാണ് ഒരുക്കിയത്.
ഇതിനിടെ, ഫിഫ ഇന്റർകോണ്ടിനെന്റൽ കപ്പ് 2025ന്റെ ഫൈനൽ ഉൾപ്പെടെ മൂന്നു മത്സരങ്ങൾ ഡിസംബർ 10, 13, 17 തീയതികളിൽ അഹമ്മദ് ബിൻ അലി സ്റ്റേഡിയത്തിൽ നടന്നു. ഈ സ്റ്റേഡിയം അൽ റിഫാ – മാൾ ഓഫ് ഖത്തർ മെട്രോ സ്റ്റേഷനുമായി നേരിട്ട് ബന്ധിപ്പിച്ചിരിക്കുന്നതാണ്.പ്രവർത്തന കാര്യക്ഷമതയുടെ ഭാഗമായി, ഈ കാലയളവിൽ 48,422 ട്രെയിൻ സർവീസുകൾ പൂർത്തിയാക്കി. ഇതിൽ 41,843 മെട്രോ ട്രിപ്പുകളും 6,579 ട്രാം ട്രിപ്പുകളും ഉൾപ്പെടുന്നു. ടൂർണമെന്റ് കാലത്ത് ആകെ കാണികളുടെ 34 ശതമാനം പേർ മെട്രോ ഉപയോഗിച്ചപ്പോൾ, മെട്രോ സ്റ്റേഷനുകളുമായി നേരിട്ട് ബന്ധമുള്ള സ്റ്റേഡിയങ്ങളിലെ മത്സരങ്ങളിൽ ഈ എണ്ണം 50 ശതമാനമായി ഉയർന്നു.
ഡിസംബർ 18-ന്, ഖത്തർ ദേശീയ ദിനാഘോഷങ്ങളോടൊപ്പം നടന്ന അറബ് കപ്പ് ഫൈനലിനും മൂന്നാം സ്ഥാന മത്സരത്തിനും ഒപ്പം, ടൂർണമെന്റിലെ ഏറ്റവും ഉയർന്ന ദിനയാത്രക്കാരുടെ എണ്ണം രേഖപ്പെടുത്തി — 3,57,287 പേർ. ഇതിൽ 3,47,987 പേർ മെട്രോയും 9,300 പേർ ട്രാമും ഉപയോഗിച്ചു.
DECC, ലുസൈൽ QNB, മുഷെയ്രിബ് സ്റ്റേഷനുകളാണ് മെട്രോ നെറ്റ്‌വർക്കിൽ ഏറ്റവും തിരക്കേറിയതെന്നും, ലുസൈൽ ട്രാം നെറ്റ്‌വർക്കിൽ ലെഗ്തൈഫിയ സ്റ്റേഷൻ ഏറ്റവും തിരക്കേറിയതായും ഖത്തർ റെയിൽ അറിയിച്ചു.
അറബ് കപ്പും ഇന്റർകോണ്ടിനെന്റൽ കപ്പും വിജയകരമായി സംഘടിപ്പിക്കുന്നതിൽ ഖത്തർ റെയിൽ നിർണായക പങ്ക് വഹിച്ചതായി അധികൃതർ വ്യക്തമാക്കി.