ഇസ്ലാമാബാദ്: പാകിസ്ഥാനെയും പാക് അധീന കശ്മീരിനെയും ലക്ഷ്യമിട്ട് ഇന്ത്യ നടത്തിയ സൈനിക നടപടിയായ ഓപ്പറേഷൻ സിന്ദൂറിനിടെ തങ്ങൾക്ക് ദൈവിക സഹായം ലഭിച്ചതായി പാകിസ്ഥാൻ സംയുക്ത സേനാ മേധാവി അസിം മുനീർ അവകാശപ്പെട്ടു. ഇന്ത്യയുടെ ആക്രമണ സമയത്ത് പാകിസ്ഥാൻ സേനയ്ക്ക് അസാധാരണമായ പിന്തുണ ലഭിച്ചതായും അത് നേരിട്ട് അനുഭവപ്പെട്ടുവെന്നും അദ്ദേഹം പറഞ്ഞു.
ഇന്ത്യയുടെ നടപടി പഹൽഗാമിൽ 26 സാധാരണക്കാർ കൊല്ലപ്പെട്ട ഭീകരാക്രമണത്തിന് പ്രതികാരമായാണ് മേയ് 7-ന് ആരംഭിച്ചത്. ഈ പശ്ചാത്തലത്തിലാണ് ഓപ്പറേഷൻ സിന്ദൂർ നടപ്പാക്കപ്പെട്ടത്. ഇന്ത്യയുടെ ആക്രമണത്തിനിടെ ദൈവിക ഇടപെടൽ ഉണ്ടായിരുന്നുവെന്ന മുനീറിന്റെ പ്രസ്താവന രാഷ്ട്രീയ-സൈനിക തലങ്ങളിൽ ചർച്ചയാകുകയാണ്.
‘‘അതിർത്തി കടന്നു നുഴഞ്ഞുകയറുന്ന ഭീകര സംഘങ്ങളിൽ ഭൂരിഭാഗവും അഫ്ഗാൻ പൗരന്മാരാണ്. പാക് താലിബാൻ അല്ലെങ്കിൽ പാകിസ്ഥാൻ, ഇതിൽ ഒന്നിനെ മാത്രമേ അഫ്ഗാൻ ഭരണകൂടം അംഗീകരിക്കാൻ പാടുള്ളൂ. ലോകത്ത് 57 ഇസ്‍ലാമിക രാജ്യങ്ങളുണ്ട്. അതിൽ അറേബ്യൻ ദേശത്തിന്റെ സംരക്ഷകരാകാനുള്ള ബഹുമതി ദൈവം നമുക്ക് മാത്രമേ നൽകിയിട്ടുള്ളൂ’’ – അസിം മുനീർ പറഞ്ഞു.
