സാൻ ഫ്രാൻസിസ്കോ: ആർട്ടിഫിഷ്യൽ ഇന്റലിജൻസ് രംഗത്തെ ആഗോള ഭീമനായ ഓപ്പൺഎഐ (OpenAI), തങ്ങളുടെ ശ്രദ്ധ ഉപഭോക്തൃ സേവനങ്ങളിൽ നിന്ന് ബിസിനസ് കേന്ദ്രീകൃത ഉൽപ്പന്നങ്ങളിലേക്ക് മാറ്റുന്നു. ആന്ത്രാപിക് പോലുള്ള പ്രധാന എതിരാളികളിൽ നിന്നുള്ള കടുത്ത സമ്മർദ്ദവും ലാഭക്ഷമത വർദ്ധിപ്പിക്കേണ്ടതിന്റെ അനിവാര്യതയുമാണ് ഈ തന്ത്രപരമായ മാറ്റത്തിന് പിന്നിലെന്ന് കമ്പനി അറിയിച്ചു.അത്യാധുനികമായ തൊഴിൽ ആവശ്യങ്ങൾക്കായി (High-value professional work) പ്രത്യേക എഐ മോഡലുകൾ ഉടൻ പുറത്തിറക്കുമെന്ന് ഓപ്പൺഎഐ ചീഫ് ഫിനാൻഷ്യൽ ഓഫീസർ സാറ ഫ്രയർ വ്യക്തമാക്കി. ഇമെയിലുകൾ സംഗ്രഹിക്കാനും ദൈനംദിന ഓഫീസ് ജോലികൾ ലഘൂകരിക്കാനും സഹായിക്കുന്ന സംവിധാനങ്ങൾ കോർപ്പറേറ്റ് ലോകത്തെ ലക്ഷ്യമിട്ടാണ് രൂപകൽപ്പന ചെയ്തിരിക്കുന്നത്.
നിലവിൽ ChatGPT-ക്ക് 90 കോടിയിലധികം പ്രതിവാര ഉപയോക്താക്കളുണ്ടെങ്കിലും അതിൽ 95 ശതമാനവും സൗജന്യ സേവനമാണ് ഉപയോഗിക്കുന്നത്. ഇത് കമ്പനിയുടെ കമ്പ്യൂട്ടിംഗ് വിഭവങ്ങളിൽ വലിയ സാമ്പത്തിക ബാധ്യത വരുത്തുന്ന സാഹചര്യത്തിലാണ് ബിസിനസ് ഉപയോക്താക്കളിൽ നിന്ന് വരുമാനം കണ്ടെത്താനുള്ള നീക്കം.
നിലവിൽ 85,200 കോടി ഡോളർ മൂല്യമുള്ള ഓപ്പൺഎഐയും 38,000 കോടി ഡോളർ മൂല്യമുള്ള ആന്ത്രാപിക്കും ലാഭക്ഷമത ലക്ഷ്യമിട്ട് വൻകിട കോർപ്പറേറ്റ് ഉപഭോക്താക്കളെ ആകർഷിക്കാനുള്ള കടുത്ത മത്സരത്തിലാണ്. വാൾസ്ട്രീറ്റിൽ ലിസ്റ്റ് ചെയ്യപ്പെടുന്നതിലൂടെ പൊതുവിപണിയിൽ ഇറങ്ങുന്നതിന് മുന്നോടിയായി വരുമാനം വർദ്ധിപ്പിക്കുക എന്നതാണ് ഇരു കമ്പനികളുടെയും ലക്ഷ്യം.
