ദോഹ :ഉരീദു (Ooredoo) ഗ്രൂപ്പ് മാനേജിംഗ് ഡയറക്ടറും സി.ഇ.ഒയുമായ മിസ്റ്റർ അസീസ് അൽ-ഉഥ്മാൻ ഫക്രോ, ഫോബ്‌സ് മിഡിൽ ഈസ്റ്റിന്റെ (Forbes Middle East) ഏറ്റവും കരുത്തരായ സി.ഇ.ഒമാരുടെ പട്ടികയിൽ ഇടംപിടിച്ചു. മേഖലയിലെ ഡിജിറ്റൽ പരിവർത്തനത്തിനും നവീകരണത്തിനും നേതൃത്വം നൽകുന്നവരെ ആദരിക്കുന്നതിനായി ആദ്യമായി തയ്യാറാക്കിയ പട്ടികയാണിത്.2020 മുതൽ അദ്ദേഹം ഊറിഡൂ ഗ്രൂപ്പിനെ നയിക്കുന്നു. അതിനുമുമ്പ് ഖത്തർ ധനകാര്യ മന്ത്രാലയത്തിൽ അസിസ്റ്റന്റ് അണ്ടർസെക്രട്ടറിയായും സേവനമനുഷ്ഠിച്ചിട്ടുണ്ട്.
2025 സെപ്റ്റംബറിൽ 'ഇന്നോവേറ്റിക്സ് സിസ്റ്റംസുമായി' ചേർന്ന് ഖത്തർ, ടുണീഷ്യ, കുവൈറ്റ്, മാൽഡീവ്സ് എന്നിവിടങ്ങളിൽ അത്യാധുനിക സൈബർ സെക്യൂരിറ്റി സേവനങ്ങൾ അദ്ദേഹം ആരംഭിച്ചു.2025-ന്റെ ആദ്യ ഒമ്പത് മാസങ്ങളിൽ കമ്പനി 5 ബില്യൺ ഡോളർ വരുമാനം നേടി. ഗ്രൂപ്പിന്റെ മൊത്തം ആസ്തി 17.5 ബില്യൺ ഡോളറാണ്.14.7 കോടിയിലധികം ഉപഭോക്താക്കളും 5 അറബ് രാജ്യങ്ങളിലായി 26 ഡാറ്റാ സെന്ററുകളും ഊറിഡൂ ഗ്രൂപ്പിനുണ്ട്.ആർട്ടിഫിഷ്യൽ ഇന്റലിജൻസ്, കമ്മ്യൂണിക്കേഷൻസ്, സൈബർ സുരക്ഷ, ഡിജിറ്റൽ ഇൻഫ്രാസ്ട്രക്ചർ എന്നീ മേഖലകളിൽ സ്വാധീനം ചെലുത്തുന്ന നേതാക്കളെയാണ് ഈ പട്ടികയിലൂടെ ഫോബ്‌സ് ആദരിക്കുന്നത്.
