ബംഗളൂരു: നിലവിലുള്ള എംപിമാർക്കും എംഎൽഎമാർക്കുമെതിരായ ക്രിമിനൽ കേസുകൾ പരിഗണിക്കാനും വിചാരണ നടത്താനും സുപ്രീംകോടതിയുടെ നിർദേശപ്രകാരം രൂപീകരിച്ച പ്രത്യേക കോടതികൾക്ക് മാത്രമേ അധികാരമുള്ളൂവെന്ന് കർണാടക ഹൈക്കോടതി വ്യക്തമാക്കി. ജനപ്രതിനിധികൾ നിയമസഭയിലോ പാർലമെന്റിലോ അംഗങ്ങളാകുന്നതിന് മുമ്പാണോ ശേഷമാണോ കുറ്റകൃത്യം നടത്തിയതെന്നത് ഇക്കാര്യത്തിൽ പ്രസക്തമല്ലെന്നും കോടതി നിരീക്ഷിച്ചു.
ജസ്റ്റിസ് എം. നാഗപ്രസന്ന അധ്യക്ഷനായ ബെഞ്ചാണ് ഈ സുപ്രധാന ഉത്തരവ് പുറപ്പെടുവിച്ചത്. ജനപ്രതിനിധികൾക്കെതിരായ കേസുകൾ വേഗത്തിൽ വിചാരണ ചെയ്ത് തീർപ്പാക്കുന്നതിനായി സുപ്രീംകോടതി 2017ൽ നൽകിയ നിർദേശത്തിന്റെ അടിസ്ഥാനത്തിൽ രൂപീകരിച്ച പ്രത്യേക കോടതികൾക്കാണ് ഇത്തരം കേസുകൾ കൈകാര്യം ചെയ്യാനുള്ള അധികാരമെന്ന് ഹൈക്കോടതി വ്യക്തമാക്കി.
മുൻ ജെഡിഎസ്സ്  എംഎൽസിയായ ബി.എം. ഫാറൂഖിനെതിരായ കേസുമായി ബന്ധപ്പെട്ട ഹർജി പരിഗണിക്കവെയാണ് ഹൈക്കോടതിയുടെ ഈ നിർണായക ഉത്തരവ്.
2018ൽ എംഎൽസിയായി തിരഞ്ഞെടുക്കപ്പെട്ട ഫാറൂഖിനെതിരെ ക്രിമിനൽ വിശ്വാസവഞ്ചന, വഞ്ചന, വ്യാജരേഖ ചമയ്ക്കൽ, ഗൂഢാലോചന തുടങ്ങിയ കുറ്റങ്ങളാണ് ആരോപിക്കപ്പെട്ടിരുന്നത്. കേസ് അന്വേഷിച്ച പോലീസ് 2021ൽ ക്ലോഷർ റിപ്പോർട്ട് സമർപ്പിച്ചെങ്കിലും പരാതിക്കാരൻ വിയോജന  ഹർജി നൽകി. തുടർന്ന് 2023 മേയ് നാലിന് മജിസ്‌ട്രേറ്റ് കോടതി ആരോപിക്കപ്പെട്ട കുറ്റങ്ങൾ പരിഗണിച്ച് നടപടികളുമായി മുന്നോട്ടുപോയി.
എന്നാൽ, ജനപ്രതിനിധിയായിരുന്ന ഫാറൂഖിനെതിരായ കേസ് പരിഗണിക്കാൻ സാധാരണ മജിസ്‌ട്രേറ്റ് കോടതിക്ക് അധികാരമില്ലെന്നും പ്രത്യേക എംപി-എംഎൽഎ കോടതിയാണ് കേസ് പരിഗണിക്കേണ്ടതെന്നും അദ്ദേഹത്തിന്റെ അഭിഭാഷകൻ ഹൈക്കോടതിയിൽ വാദിച്ചു. പ്രോസിക്യൂഷനും ഈ വാദം അംഗീകരിച്ചു.
തുടർന്ന് ഫാറൂഖിനെതിരായ കേസിൽ തുമകുരു കോടതി 2024 മേയ് 29ന് പുറപ്പെടുവിച്ച ഉത്തരവ് ഹൈക്കോടതി റദ്ദാക്കി. കേസിൽ തുടർനടപടികൾ സ്വീകരിക്കാനും വിചാരണയുടെ നടപടിക്രമങ്ങൾ നിയന്ത്രിക്കാനുമുള്ള അധികാരം ബന്ധപ്പെട്ട പ്രത്യേക കോടതിക്ക് വിട്ടുനൽകുകയും ചെയ്തു.
എംപിമാർക്കും എംഎൽഎമാർക്കുമെതിരായ ക്രിമിനൽ കേസുകളുടെ വിചാരണയിൽ പ്രത്യേക കോടതികളുടെ അധികാരം ഒരിക്കൽക്കൂടി വ്യക്തമാക്കുന്നതാണ് കർണാടക ഹൈക്കോടതിയുടെ ഈ ഉത്തരവ്.

Photo Courtesy - Google